RF Xavfsizlik kengashi rahbari oʻrinbosari Dmitriy Medvedev Vilnyusda yadro qurolini joylashtirishga qoʻyilgan taqiqni bekor qilish boʻyicha takliflar muhokamasi fonida Litvaning «dunyo xaritasidan yoʻq boʻlib ketishi» bilan tahdid qildi.
Medvedevning fikricha, Rossiya Litvaga zarba beradigan boʻlsa, uning NATOdagi ittifoqchilari alyans nizomining Kollektiv mudofaa toʻgʻrisidagi beshinchi moddasini eʼtiborsiz qoldiradi.
«Hech kim ularning yonini olmaydi. Hatto u yerga oʻt qoʻyib yuborilsa ham, hech qanday mamlakat ular uchun jang qilmaydi. Shimoliy Atlantika shartnomasining mashhur Beshinchi moddasi ham qoʻllanmaydi, buni barcha tan oladi. Chunki agar u ishga tushirilsa – bu global, sayyoraviy falokat boʻladi. Ular ahmoq emas. Ammo Litva dunyo xaritasidan yoʻq boʻlib ketadi», – degan u Shimoli-gʻarbiy federal okrug harbiylari bilan muloqot chogʻida.
Litva mudofaa vazirligi iyun oyi boshida AQSH bilan oʻz hududida yadro qurolini joylashtirish boʻyicha muzokaralar olib borayotganini maʼlum qilgandi. OAV maʼlumotlariga koʻra, gap Amerikaning yadroviy kallaklarni olib yurishga qodir boʻlgan bombardimonchi samolyotlari haqida ketmoqda.
Litva konstitutsiyasining amaldagi tahririda mamlakat hududida yalpi qirgʻin qurollari va xorijiy harbiy bazalarni joylashtirish taqiqlangan. Bir kun avval Litva parlamenti (seym) spikeri Yuozas Olyakas deputatlar «geosiyosiy reallikka mos kelmaydigan» bu taqiqni bekor qilishga tayyorgarlik koʻrayotganini aytdi. Buning uchun seym hatto kuzgi sessiyani yanvargacha uzaytirishni rejalashtirmoqda.
RF prezidenti matbuot kotibi Dmitriy Peskov Vilnyusning harakatlarini «keskinlik nuqtayi nazaridan juda jiddiy burilish» deb atadi va «bu qurol, shubhasiz, Rossiyaga qaratilgani» uchun Litva hududi ham «Rossiya yadro quroli nishonida turishi»ni taʼkidladi.
Vladimir Putinning oʻzi esa «Yevropa elitalari» nima deyayotganidan qatʼi nazar, Rossiya Yevropa davlatlariga tahdid qilmayotgani va tahdid qilmoqchi emasligini aytdi.
«Biz Yevropa mamlakatlariga tahdid qilmaymiz, tahdid qilmoqchi ham emasmiz. Nima uchun? Axir hech kim Yevropa bilan qandaydir mojaro uchun asosimiz yoʻqligini oʻylab ham koʻrmaydi. Barcha masalalar Ikkinchi jahon urushi natijalariga koʻra hal qilingan», – dedi Putin. U faqat Yevropa harbiy kontingenti Ukrainaga joylashtirilishigina «Rossiya bilan urush»ni anglatishini qayd etgan.
