Chekka hududlarda universal kassalar tashkil etiladi – MB

Bu haqda Markaziy bankning Jamoatchilik bilan aloqalar va kommunikatsion siyosat departamenti direktori o‘rinbosari Akmal Nazarov ma'lum qildi.

«Markaziy bank tomonidan bank infratuzilmasi yetarli bo‘lmagan chekka hududlarda yashovchi va naqd puldan foydalanishga ehtiyoji bo‘lgan aholiga xizmat ko‘rsatadigan universal kassalar tashkil etish va aholi tomonidan murojaat bo‘lganda yashash manzillariga borib bank xizmatlarini ko‘rsatish bo‘yicha barcha banklarga tegishli ko‘rsatmalar berildi», – dedi Akmal Nazarov 14 aprel kuni AOKAda bo‘lib o‘tgan brifingda.

Ma'lum qilinishicha, universal kassalar aholiga pul o‘tkazmalari, xorijiy valutani sotib olish yoki sotish bo‘yicha xizmatlarni taqdim etishga mo‘ljallangan.

Shuningdek, mijozlar bilan oldindan kelishilgan holda tegishli so‘rovlarga binoan, vaqti-vaqti bilan ma'lum joylarga chiqqan holda boshqa chakana bank xizmatlari ham ko‘rsatiladi.

«Bu amaliyotlarni bajarishda sanitariya talablariga qat'iy rioya qilish, joylarga boradigan barcha xodimlarni zarur vositalar: maxsus himoya kiyimlari, niqoblar, qo‘lqoplar va antiseptik vositalar bilan ta'minlash va bank xizmati ko‘rsatib bo‘lingandan keyin ham xodimlarni dezinfeksiya qilish nazoratga olingan», – dedi Akmal Nazarov.

Markaziy bank vakiliga ko‘ra, respublika bo‘yicha naqd xorijiy valutani so‘mga ayirboshlashga ixtisoslashgan avtomatlashtirilgan 700 ta bankomat mavjud va ularning sonini mingga yetkazish rejalashtirilgan.

Akmal Nazarov asosiy bank amaliyotlari: xorijiy valutani sotib olish yoki sotish, pul o‘tkazmalarini amalga oshirish, depozit operatsiyalari, kommunal xizmatlar yoki soliq to‘lovlarini amalga oshirishni masofadan turib mobil bank ilovalari orqali bajarish imkoni ham borligini eslatib o‘tdi.

«Shuning uchun fuqarolarga bank ofislariga bormasdan qaysi bankning mijozi bo‘lsalar, o‘sha bankning mobil ilovasi bilan diqqat bilan tanishib chiqishni tavsiya etamiz», – dedi u.