Prezidentning “Abu Dabi rivojlanish jamg‘armasi (BAA) ishtirokida “Samarqand shahrida suv ta'minoti tizimlari va yo‘l tarmoqlarini modernizatsiya qilish” loyihasini amalga oshirish chora-tadbirlari to‘g‘risida”gi qarori loyihasi e'lon qilindi.
Prezidentning “O‘zbekiston Respublikasi va Birlashgan Arab Amirliklari o‘rtasida ikki tomonlama hamkorlikni yanada mustahkamlash va kengaytirish chora-tadbirlari to‘g‘risida”gi 2019 yil 2 apreldagi PQ-4256-son qaroriga asosan, Uy-joy kommunal xizmat ko‘rsatish vazirligi, Transport vazirligi, Avtomobil yo‘llari qo‘mitasi, Qurilish vazirligi, Moliya vazirligi, Investitsiyalar va tashqi savdo vazirligi hamda Samarqand viloyati hokimligining “Samarqand shahrida suv ta'minoti, oqova va yo‘l tizimlarini modernizatsiya qilish” loyihasini bosqichma-bosqich amalga oshirish to‘g‘risidagi taklifiga rozilik beriladi.
Qayd etilishicha:
O‘zbekiston Respublikasiga Abu Dabi rivojlanish jamg‘armasi (BAA) direktorlar kengashi tomonidan loyihani moliyalashtirish bo‘yicha kreditga xizmat ko‘rsatganlik uchun xizmat haqi 0,5 foiz, yillik 2,50 foiz stavkasi bilan 4 yillik imtiyozli davrini hisobga olib 17 yil muddatga 300,0 mln. AQSh dollari miqdorida kredit taqdim etishi ma'qullangan;
Loyiha doirasida ishlarning turlari va hajmlarini belgilaydigan batafsil loyiha konsepsiyasi Abu Dabi rivojlanish jamg‘armasi (BAA) talablariga muvofiq ishlab chiqilgan.
Belgilab qo‘yilishicha:
loyiha Abu Dabi rivojlanish jamg‘armasi (BAA) tomonidan berilayotgan kredit mablag‘lari hisobidan moliyalashtiriladi;
Abu Dabi rivojlanish jamg‘armasi (BAA) kredit mablag‘laridan maqsadli va samarali foydalanish, shuningdek loyihani o‘z vaqtida amalga oshirish uchun Samarqand viloyati hokimligini mas'ul hisoblanadi;
loyihaning texnik-iqtisodiy asosini ishlab chiqish 2021 yil 1 fevralgacha loyiha bilan bir vaqtda amalga oshiriladi;
loyihaning texnik-iqtisodiy asosi 2021 yil 1 aprelga qadar O‘zbekiston Respublikasi Vazirlar Mahkamasiga taqdim etiladi;
Abu Dabi rivojlanish jamg‘armasi(BAA)ning kredit mablag‘lari bo‘yicha xizmat haqi to‘lovlari, foiz va asosiy qarzni to‘lash O‘zbekiston Respublikasi Davlat budjeti hisobidan amalga oshiriladi.
