YHXBB Navoiyda YPX xodimi va fuqaro o‘rtasida sodir bo‘lgan voqea yuzasidan izoh berdi

O‘zbekiston Respublikasi IIV YHXBB axborot xizmati internetda bodikamerasiz YPX xodimi fuqaroning qo‘l telefonini urib, avtomobiliga o‘tirib olgani haqida tarqalgan videolavhaga munosabat bildirdi.

Qayd etilishicha, joriy yilning 21 may kuni soat 17:10larda, Navoiy viloyati, Uchquduq tumanidan Zarafshon shahri yo‘nalishi bo‘yicha bir nafar yo‘lovchi bilan harakatlanib kelayotgan “Labo” rusumli transport vositasi “Uchquduq” to‘siq postida xizmat olib borayotgan Milliy gvardiya xodimlari tomonidan dezinfeksiya choralarini ko‘rish maqsadida to‘xtatilib, haydovchidan transport vositasini qayd etish guvohnomasini taqdim etishi, ushbu ma'lumotlar postda yuritilayotgan jurnalga qayd etilishini ma'lum qilishgan.

Bildirilishicha, haydovchi Milliy gvardiya xodimlariga ushbu postdan har kuni o‘tib qaytishini, har safar hujjatlarini ko‘rsatmasligini aytib, ular bilan tortishib turgan vaqtida, ushbu postga xizmatga jalb etilgan Uchquduq tuman IIB YHXB ma'muriy amaliyot inspektori A.U. postda joylashgan xizmat xonasidan chiqib kelib, holatga aralashib haydovchidan hujjatlarini taqdim etishini so‘ragan.

Haydovchi unga hujjatlari yo‘qligini ma'lum qilganidan so‘ng, YPX xodimi A.U. uni avtomashinadan tushishini, avtomashinasi esa jarima maydoniga qo‘yilishini aytgan.

Haydovchi avtomashinadan tushganidan so‘ng, A.U. unga tegishli avtomashinani jarima maydoniga qo‘yish maqsadida rul boshqaruviga o‘tirgan vaqtida avtomashinada o‘tirgan yo‘lovchi xodimning harakatlarini videotasvirga olishni boshlab, xodimga nima sababdan bodikamerasiz xizmat olib borayotganligini aytib, turli vajlar keltirib, uni harakatlarini ijtimoiy tarmoqlarga joylashtirishini ma'lum qilgan va ularni qo‘yib yuborishini so‘ragan.

Shu vaqt xodim uni videotasvirga olishiga qarshilik ko‘rsatmoqchi bo‘lgan. Shundan so‘ng, A.U. tomonidan ushbu transport vositasi haydovchisi A.K.ga nisbatan O‘zbekiston Respublikasi Ma'muriy javobgarlik to‘g‘risidagi kodeksning 194- va 135-moddalariga ko‘ra bayonnoma rasmiylashtirilib, avtomashinasi evakuator yordamida jarima maydoniga qo‘yilgan. 

Shu kuni A.U. xizmatga chiqishidan oldin bodikamerasini navbatchilik qismidan olgan bo‘lsa-da, ushbu holat sodir bo‘lgan vaqtda u bodikamerasini shu postda joylashgan xizmat xonasida unutib qoldirgan.

Mazkur holat yuzasidan Navoiy viloyati IIB YHXB mas'ul xodimlari tomonidan xizmat tekshiruvi o‘tkazilmoqda, deyiladi ma'lumotda.