Diniy tashkilotlarni davlat ro‘yxatidan o‘tkazish uchun rozilik berish tartibiga o‘zgartirishlar kiritiladi

Normativ-huquqiy hujjatlar loyihalari muhokamasi portalida “Diniy tashkilotlarni davlat ro‘yxatidan o‘tkazish uchun rozilik berish tartibi to‘g‘risidagi nizomga o‘zgartirishlar kiritish haqida”gi hujjat loyihasi e'lon qilindi.

Vazirlar Mahkamasi huzuridagi Din ishlari bo‘yicha qo‘mita tomonidan ishlab chiqilgan hujjat loyihasiga ko‘ra, qo‘mitaga quyidagi hujjatlar taqdim etiladi:

a) diniy tashkilotlarning markaziy boshqaruv organlari uchun:

ta'sis yig‘ilishi (konferensiyasi)ning raisi va kotibi hamda diniy tashkilotlarning markaziy boshqaruv organini tuzish tashabbuskorlari bo‘lgan o‘n sakkiz yoshga yetgan yuz nafardan kam bo‘lmagan O‘zbekiston Respublikasi fuqarosi imzolagan Nizomning 1-ilovasidagi shaklga muvofiq ariza;

markaziy boshqaruv organni tashkil qilish, uning ustavini tasdiqlash va rahbar organlarini saylash bo‘yicha ma'lumotlar mavjud bo‘lgan ta'sis yig‘ilishi (konferensiyasi) bayonnomasi va markaziy boshqaruv organi ustavining nusxalari;

markaziy boshqaruv organining ta'sischilari to‘g‘risidagi Nizomning 2-ilovasidagi shaklga muvofiq ma'lumot;

markaziy boshqaruv organining rahbar organi a'zolari to‘g‘risidagi Nizomning 3-ilovasidagi shaklga muvofiq ma'lumot;

markaziy boshqaruv organi rahbarlarining diniy ma'lumoti haqidagi hujjatlari (diniy ma'lumot haqidagi hujjat xorijiy davlatda berilganda uning tan olinganligi bo‘yicha hujjat nusxasi ham taqdim qilinadi) nusxalari;

markaziy boshqaruv organining yuridik (pochta) manzili to‘g‘risida tegishli mahalliy davlat hokimiyati organining (O‘zbekiston Respublikasi Qurilish vazirligi, Sog‘liqni saqlash vazirligi sanitariya-epidemiologik osoyishtalik markazlari, Favqulodda vaziyatlar vazirligi Davlat yong‘in xavfsizligi xizmatining tegishli bo‘linmalari va fuqarolarning o‘zini o‘zi boshqarish organlarining rozilik xatining nusxasi ilova qilingan holda) kafolat xati nusxasi;

b) diniy ta'lim muassasalari uchun:

diniy tashkilotlarning markaziy boshqaruv organi rahbari hamda diniy ta'lim muassasasi tuzish tashabbuskorlari bo‘lgan o‘n sakkiz yoshga yetgan yuz nafardan kam bo‘lmagan O‘zbekiston Respublikasi fuqarosi imzolagan Nizomning 1-ilovasidagi shaklga muvofiq ariza;

diniy ta'lim muassasasini tashkil qilish, ustavini tasdiqlash va rahbar organlarini saylash (tayinlash) bo‘yicha ma'lumotlar mavjud bo‘lgan markaziy boshqaruv organining vakolatli rahbar organi yig‘ilishi bayonnomasining va diniy ta'lim muassasasi ustavining nusxalari;

diniy ta'lim muassasasi ta'sischisi — diniy tashkilotlarning markaziy boshqaruv organi ro‘yxatdan o‘tkazilganligi haqidagi guvohnoma va ustavining nusxasi;

diniy ta'lim muassasasining rahbar organi a'zolari to‘g‘risidagi Nizomning 3-ilovasidagi shaklga muvofiq ma'lumot;

diniy ta'lim muassasasi rahbarlarining diniy ma'lumoti haqidagi hujjatlari (diniy ma'lumot haqidagi hujjat xorijiy davlatda berilganda uning tan olinganligi bo‘yicha hujjat nusxasi ham taqdim qilinadi) nusxalari;

diniy ta'lim muassasasining yuridik (pochta) manzili to‘g‘risida tegishli mahalliy davlat hokimiyati organining (O‘zbekiston Respublikasi Qurilish vazirligi, Sog‘liqni saqlash vazirligi sanitariya-epidemiologik osoyishtalik markazlari, Favqulodda vaziyatlar vazirligi Davlat yong‘in xavfsizligi xizmatining tegishli bo‘linmalari va fuqarolarning o‘zini o‘zi boshqarish organlarining rozilik xati nusxasi ilova qilingan holda) kafolat xati nusxasi;

v) mahalliy diniy tashkilotlar uchun:

diniy tashkilot tuzish tashabbuskorlari bo‘lgan o‘n sakkiz yoshga yetgan yuz nafardan kam bo‘lmagan O‘zbekiston Respublikasi fuqarolari imzolagan Nizomning 1-ilovasidagi shaklga muvofiq ariza;

diniy tashkilotni tashkil qilish, uning ustavini tasdiqlash va rahbar organlarini saylash bo‘yicha ma'lumotlar mavjud bo‘lgan ta'sis yig‘ilishi bayonnomasi va diniy tashkilot ustavining nusxalari;

diniy tashkilotning rahbar organi a'zolari to‘g‘risidagi Nizomning 3-ilovasidagi shaklga muvofiq ma'lumot;

diniy tashkilotni tuzish tashabbuskorlari to‘g‘risidagi Nizomning 4-ilovasidagi shaklga muvofiq ma'lumot;

diniy tashkilot rahbarlarining diniy ma'lumoti haqidagi hujjatlari (diniy ma'lumot haqidagi hujjat xorijiy davlatda berilganda uning tan olinganligi bo‘yicha hujjat nusxasi ham taqdim qilinadi) nusxalari;

diniy tashkilotning yuridik (pochta) manzili to‘g‘risida mahalliy davlat hokimiyati organining (O‘zbekiston Respublikasi Qurilish vazirligi, Sog‘liqni saqlash vazirligi sanitariya-epidemiologik osoyishtalik markazlari, Favqulodda vaziyatlar vazirligi Davlat yong‘in xavfsizligi xizmatining tegishli bo‘linmalari va fuqarolarning o‘zini o‘zi boshqarish organlarining rozilik xati nusxasi ilova qilingan holda) kafolat xati nusxasi;

diniy tashkilotga yaqin hududda joylashgan bir konfessiyaga mansub diniy tashkilotlar bilan oraliq masofa haqida aniq ma'lumot;

diniy tashkilotning faoliyat olib borishi uchun zarur bo‘lgan moliyaviy manbalari haqida ma'lumotnoma.