Xitoydagi maktabga hujum oqibatida 40dan ortiq o‘quvchi jarohatlandi

Xitoy janubidagi Guansi-Chjuan avtonom rayonida joylashgan boshlang‘ich maktabda 40dan ortiq o‘quvchilar va maktab xodimlari pichoq bilan qilingan hujum natijasida jarohat oldi.

Xabar qilinishicha, hujum Uchjou shahri yaqinidagi Vanfu qishlog‘idagi maktabda amalga oshirilgan.

Maktab qorovuli bo‘lib ishlaydigan 50 yoshli erkak kutilmaganda qo‘liga pichoq olib bolalar va kattalarga tashlangan.  

Jarohatlanganlarning aksariyati olti yoshgacha bo‘lgan bolalar ekanligi aytilmoqda. Bir o‘quvchi, maktab direktori va boshqa qorovul jiddiy jarohatlangan. Hujum qilgan shaxs hibsga olingan, uning nima uchun bunday qilganligi hozircha aniqlanmagan.

OAVning yozishicha, bu Xitoydagi maktabda yuz bergan birinchi holat emas. Shuning uchun Xitoydagi maktablar qo‘riqlanadi.