AQSh-Eron urushi
Dushanbaga kelib AQSh kuchlari ketma-ket to‘qqizinchi kun Eronga zarbalar berdi. Shu bilan birga, qayta boshlangan to‘qnashuvlarda halok bo‘lgan amerikalik harbiylarning tasdiqlangan soni uch nafarga yetdi.
«Biz bugun tunda ularga yana juda qattiq zarba berdik va buni juma kunidan beri halok bo‘lgan AQSh harbiy xizmatchilari xotirasi uchun qildik», dedi Tramp jurnalistlarga.
AQSh Markaziy qo‘mondonligi o‘z bayonotida Eronning kemalarga hujum qilish qobiliyatini «zaiflashtirish»ga qaratilgan «yangi zarbalar to‘lqini»ni boshlaganini ma’lum qildi, biroq boshqa tafsilotlar keltirilmadi.
Eron OAVlariga ko‘ra Tabriz, Chobahor, Konarak va Bandar-Mahshahr kabi shaharlarida portlash ovozlari eshitilgan.
Ma’lum qilinishicha, shanba kuni Iroq shimolidagi AQSh harbiy bazalari joylashgan hududda amerikalik bir askar halok bo‘lgan. Iordaniyada ham AQShning ikki nafar harbiy xizmatchisi halok bo‘lgan va uchinchisi bedarak yo‘qolgan.
Shu bilan Eronga qarshi urush boshlanganidan beri halok bo‘lgan AQSh harbiylari jami soni 17 nafarga yetdi. Yana 420 nafar amerikalik askar yarador bo‘lgan. 28 fevralda urush boshlagan AQSh va Isroilning o‘zi esa Eron va Livanda minglab odamlar o‘limiga sabab bo‘ldi.
O‘z navbatida, Eron Islom inqilobi muhofizlari korpusi Suriya hududidagi «dushman maxsus operatsiyalar shtab-kvartirasi»ga kutilmagan zarba berilganini e’lon qildi. Shuningdek, Kuvaytdagi aviabazalarda joylashgan AQSh harbiy ob’yektlari hamda texnikalariga dronlar orqali hujum uyushtirildi.
Bir oy oldin imzolangan vaqtinchalik sulhning barbod bo‘lishi va Ho‘rmuzni nazorat qilish uchun kurash ortidan AQSh va Eron hujumlarni jadallashtirdi. Bu esa keng ko‘lamli urushga qaytish xavfini oshirmoqda.
Jahon chempionati yakunlandi
Yakshanba kuni butun dunyoda millionlab insonlar kuzatgan futbol bayramida Ispaniya milliy jamoasi amaldagi chempion Argentinani 1:0 hisobida mag‘lub etib, Jahon kubogini ulardan tortib oldi. Bu g‘alaba Ispaniyani yana jahon futbolining cho‘qqisiga olib chiqdi va yangi davrni boshlab berdi.
Pressing ustasi bo‘lgan Ispaniya asosan to‘pga egalik qilgan bo‘lsa-da, uning hujumlarini yakunlaydigan odam topilmadi. Zaxiradan maydonga tushgan Torres qo‘shimcha taymlarda - 106-daqiqada tarixiy gol muallifi bo‘ldi.
Argentinaliklar esa Jahon chempionati finallari tarixida butun 90 daqiqada raqib darvozasiga biror marta ham zarba bera olmagan birinchi jamoaga aylandi. Messi boshchiligidagi Argentina hujum qilishdan ko‘ra ko‘proq mayda qoidabuzarliklar qilish, futbolkalardan tortish, turtish va o‘yin maromini buzish bilan band bo‘ldi.
Qaysidir ma’noda ularning o‘yinni faqat bitta qizil kartochka bilan yakunlagani ham hayratlanarli bo‘ldi deyish mumkin. Yakuniy hushtak chalinganidan keyin argentinalik futbolchilarning asabi dosh berolmay, janjal chiqardi.
FIFA rahbari Janni Infantino bilan birga o‘yinni kuzatgan AQSh prezidenti Donald Tramp yakunda Jahon kubogini ispanlarga topshirdi.
Rossiya-Ukraina urushi
Rossiya tunda Ukraina poytaxtiga urush boshlanganidan beri eng yirik ballistik raketa zarbalaridan birini berdi. Oqibatda kamida bir kishi halok bo‘ldi va yana 16 kishi yaralandi.
Ukraina Harbiy-havo kuchlarining xabar berishicha, Kiyevga turli turdagi - 41 ta raketa uchib kelgan.
Kiyev meri Vitaliy Klichko so‘zlariga ko‘ra, zarar ko‘rgan inshootlar orasida turar joy binolari, omborxonalar, supermarket va yotoqxona bor. U yana uch kishining ahvoli og‘irligini qo‘shimcha qildi.
Yakshanba kungi alohida hujumda Xarkov shahri chekkasidagi pochta deposiga berilgan zarba oqibatida to‘rt kishi halok bo‘lgan va 19 kishi yaralangan.
Rasmiylarning xabar berishicha, Zaporijjya shahrida ham Rossiya bombalari oqibatida kamida ikki kishi halok bo‘lgan va 14 kishi yaralangan.
Rossiya hujumlaridan bir kun oldin - 18 iyulga o‘tar kechasi Ukraina dronlari «Wildberries» kompaniyasining Podmoskove va Tambov viloyatidagi ikkita omboriga hujum qilgandi. Oqibatda kamida sakkiz kishi halok bo‘ldi, 80 dan ortiq kishi jarohatlandi.
Zarbalardan biri kompaniyaning Elektrostaldagi yirik logistika markaziga to‘g‘ri keldi: yong‘in oqibatida ko‘tarilgan tutun 200 kilometrdan ortiq masofaga cho‘zildi. Yong‘inni hatto bir sutka o‘tgach ham to‘liq o‘chirishning imkoni bo‘lmadi.
Zelenskiy «Wildberries» omboriga qilingan hujumga izoh berib, u yerda Rossiya armiyasi uchun dronlarning ayrim qismlari saqlanganini da’vo qildi. Shuningdek, Zelenskiy bu hujumlar Ukrainadagi fuqarolik infratuzilmasiga berilgan zarbalarga javob ekanini aytdi. Ukraina Rossiyaning boshqa regionlariga ham dronlar bilan hujum qildi.
Britaniyada yangi bosh vazir
«Shimol qiroli» nomi bilan tanilgan Endi Bornham dushanba kuni Buyuk Britaniyaning so‘nggi o‘n yillikdagi yettinchi bosh vaziriga aylanadi. U mamlakatni aholi uchun haqiqatda muhim masalalarga - yashash qiymati inqirozi va sifatsiz ishlayotgan davlat xizmatlariga ko‘proq e’tibor qaratishi uchun tizimni «qayta qurish»ga va’da bermoqda.
Bugun Kir Starmer o‘zining xayrlashuv nutqini so‘zlab, Qirol Charlzga rasman iste’foga chiqish arizasini topshiradi. Shundan keyin Katta Manchesterning sobiq meri Bornham ham monarx bilan uchrashib, bosh vazirlik lavozimini qabul qilib oladi.
Haqiqiy og‘ir ish va mas’uliyat shundan keyin boshlanadi.
Reutersʼning yozishicha, 56 yoshli Bornham Buyuk Britaniyaning samarasiz ishlayotgan kommunal xizmatlaridan tortib, sust iqtisodiy o‘sishigacha bo‘lgan uzoq muammolar ro‘yxatiga duch kelmoqda. U birinchi navbatda o‘zining yetakchi vazirlar jamoasini e’lon qilishi kerak - bu masala hozirning o‘zidayoq Leyboristlar partiyasida bahslarga sabab bo‘lmoqda.
Uning dastlabki siyosiy qarorlari ham diqqat markazida bo‘ladi, chunki uning jamoasi o‘z rejalarini tezda amalga oshirishga intilmoqda.
Peruda zilzila
Yakshanba kuni Peruning tog‘li hududida yuz bergan ikkita kuchli yer silkinishi oqibatida kamida olti kishi halok bo‘ldi va 21 kishi jarohatlandi.
Peru Milliy seysmologiya markaziga ko‘ra, magnitudasi 5.1 va 3.7 bo‘lgan ushbu zilzilalar poytaxtdan 300 km sharqda joylashgan Chupaka provinsiyasida sodir bo‘lgan.
Markazning bildirishicha, birinchi zilzila 24 km, ikkinchisi esa 18 km chuqurlikda qayd etilgan.
Dastlabki hisobotlarga ko‘ra, 48 ga yaqin uy butunlay vayron bo‘lgan, yana 18 tasi qisman zarar ko‘rgan. Tabiiy ofat qariyb 300 kishiga ta’sir ko‘rsatdi va hozirda ularga vaqtinchalik chodirlar yetkazilmoqda.
Ushbu provinsiyaning talafot ko‘rgan qishloqlaridagi uylar, odatda, xom g‘ishtdan tiklangan oddiy va mo‘rt inshootlardir. Rasmiylarga ko‘ra, favqulodda vaziyatlar guruhlari vayronalar ostida boshqa qurbonlar ham bo‘lishi haqidagi xavotirlar sababli qidiruv va tozalash ishlarini boshlagan.
Bir oy oldin Peru yaqinida - Venesuelada ham 7 balli ikkita yirik zilzila sodir bo‘lgandi. Ushbu tabiiy ofat qurbonlari soni esa 5200 kishidan oshgan.
