Qanday axborot soliq siri hisoblanadi?

Davlat soliq qo‘mitasining 30.05.2020 yildagi “Soliq to‘lovchilar to‘g‘risida hisob ma'lumotlarini yuritish, bu ma'lumotlarni uchinchi shaxslarga taqdim etish, shuningdek soliq to‘lovchilarning ayrim toifalari uchun ma'lumotlar tarkibini shakllantirish tartibini tasdiqlash to‘g‘risida”gi ro‘yxat raqami 3237-son qarori e'lon qilindi.
 
Norma’ning yozishicha, tartib quyidagilarni belgilaydi:

soliq to‘lovchi to‘g‘risidagi qaysi hisob ma'lumotlari soliq sirini tashkil etishi;

soliq to‘lovchilar to‘g‘risidagi ma'lumotlarni uchinchi shaxslarga qanday va qay tarzda taqdim etish;

ayrim soliq to‘lovchilar (to‘g‘ridan-to‘g‘ri xususiy chet el investitsiyalari ishtirokidagi yuridik shaxslar, maxsus iqtisodiy zonalarning (MIZ) ishtirokchilari, advokatlar hay'atlari, advokatlik firmalari va byurolari).
 
Soliq to‘lovchi to‘g‘risida hisob ma'lumotlari deganda soliq organlariga u tomonidan taqdim etilgan ma'lumotlar, shuningdek SKning 133-moddasida nazarda tutilgan tartibda  organlar, muassasalar va tashkilotlar tomonidan taqdim etilgan ma'lumotlar tushuniladi.
 
Yuridik va jismoniy shaxslar, shuningdek yakka tartibdagi tadbirkorlar to‘g‘risidagi hisob ma'lumotlari tarkibi SKning 132-moddasida belgilangan.
 
Soliq organlariga u tomonidan taqdim etilgan soliq to‘lovchi to‘g‘risida hisob ma'lumotlari, shuningdek organlar, muassasalar va tashkilotlar tomonidan taqdim etilgan ma'lumotlar Tartib bilan soliq sirini o‘z ichiga olgan va olmagan ma'lumotlarga ajratilgan.
 
Tartibga muvofiq quyidagi ma'lumotlar soliq siri hisoblanadi:

Tadbirkorlik sub'yektlarining yagona davlat reyestridan olingan ko‘chirma, bundan soliq siri hisoblanmaydigan ma'lumotlar mustasno;

ichki ishlar organlaridan olingan pasport ma'lumotlari;

ko‘chmas mulk va yer uchastkasiga bo‘lgan huquqni tasdiqlovchi ma'lumotlar, shuningdek uning egalari to‘g‘risidagi ma'lumotlar;

tabiiy resurslardan foydalanish bilan bog‘liq faoliyatni litsenziyalashni amalga oshiruvchi organlardan olingan litsenziya va ruxsatnomalar to‘g‘risidagi ma'lumotlar;

suv resurslarini hisobga olishni amalga oshiruvchi organlardan olingan o‘lchov asboblarisiz foydalanilgan suv hajmlari to‘g‘risidagi ma'lumotlar;

chet el yuridik shaxslarining vakolatxonalari akkreditatsiyadan o‘tkazilganligi to‘g‘risidagi ma'lumotlar;

xalqaro tashkilotlarning hamda chet el NNTning vakolatxonalari reyestrini yurituvchi tashkilotlardan olingan xalqaro tashkilotlar hamda chet el NNT to‘g‘risidagi ma'lumotlar;

vasiylik yoki homiylik faoliyati hamda mol-mulk boshqaruvi to‘g‘risida ma'lumotlar;

notariuslardan olingan ko‘chmas mulk oldi-sotdi shartnomalari, mol-mulk ijarasi shartnomalari, merosga egalik qilish shartnomalari haqidagi ma'lumotlar;

patentlar berishni amalga oshiruvchi organlardan olingan chet ellik fuqarolarga yoki fuqaroligi bo‘lmagan shaxslarga ishlash uchun ruxsatnomalar to‘g‘risidagi ma'lumotlar;

Markaziy depozitariydan olingan qimmatli qog‘ozlar bo‘yicha bitimlar to‘g‘risidagi axborotlar;

bojxona organlaridan olingan eksport-import operatsiyalari to‘g‘risidagi axborotlar;

Internet milliy segmentining domen nomlari tizimini belgilovchi organdan olingan domen nomlarining ma'murlari to‘g‘risidagi axborotlar.
 
Soliq to‘lovchilar to‘g‘risidagi ma'lumotlarni shakllantirish soliq to‘lovchining identifikatsiya raqami (STIR) asosida amalga oshiriladi. Soliq to‘lovchilar to‘g‘risidagi hisob ma'lumotlari O‘zbekiston Respublikasi soliq to‘lovchilarining yagona reyestriga kiritiladi.
 
Soliq sirini o‘z ichiga olgan ma'lumotlar oshkor qilinmaydi, bundan qonun hujjatlarida nazarda tutilgan hollar mustasno.
 
Soliq organlariga ma'lumotlar taqdim etuvchi organlar va muassasalar o‘zaro hamkorlikni SKning 133-moddasiga asosan axborot xavfsizligi talablariga rioya qilgan holda elektron tarzda amalga oshiradilar.
 
Jinoyat-protsessual kodeksining 201-moddasiga asosan sudlarga hamda huquqni muhofaza qiluvchi organlarga ularning so‘roviga asosan soliq sirini tashkil etuvchi ma'lumotlar taqdim etilishi mumkin. Qonun hujjatlarida nazarda tutilgan hollarda tijorat tashkilotlariga soliq sirini tashkil etuvchi ma'lumotlar faqatgina soliq to‘lovchilarning roziligi bilan taqdim etilishi mumkin.
 
Soliq to‘lovchi kontragentlarni tanlash chog‘ida ular to‘g‘risidagi soliq siri hisoblanmaydigan ma'lumotlarni o‘z shaxsiy kabinetlari orqali olishlari mumkin.
 
Uchinchi shaxs tomonidan soliq organlaridan olingan barcha ma'lumotlar va axborotlar soliq siri hisoblanadi hamda ulardan faqat xizmat doirasida foydalaniladi.
 
Hujjat 30.05.2020 yildan kuchga kirdi.