Polshaning amaldagi prezidenti Anjyey Duda ikkinchi muddatga saylandi. Bu haqda prezident saylovlaridagi barcha ovoz berish byulletenlari qo‘ldan o‘tkazilgandan keyin Davlat saylov komissiyasi ma'lum qildi.
Yakuniy raqamlar Dudaning saylovlarning 2-bosqichida 51,03 ovoz bilan g‘alaba qozonganini tasdiqlagan. Uning Polshadagi eng yirik muxolif partiya “Fuqarolik platformasi”dan bo‘lgan raqibi - Varshava meri Rafal Tshaskovskiy uchun 48,97 foiz ovoz berilgan.
Komissiya rahbari Silvestr Marchinyakning matbuot anjumanda ma'lum qilishicha, Duda uchun 10 mln 440 ming 648 nafar, Tshaskovskiyga esa 10 mln 18 ming 263 nafar polshalik o‘z ovozini bergan.
Saylovchilarning ishtiroki 68,18 foizni tashkil qilgan. Marchinyakning ta'kidlashicha, saylovlarda ovoz berish huquqiga ega bo‘lgan 30 mln polshalikdan 20 mlndan ko‘prog‘i ishtirok etgan.
Polshada prezident saylovlari har besh yilda o‘tkaziladi. Bir kishi prezident lavozimini qatorasiga 2 martadan ko‘proq egallay olmaydi. Duda 2015 yildagi saylovlarda g‘alaba qozongach, prezident kursisini egallagandi.
Bungacha prezident lavozimini qatorasiga 2 muddat egallashga Aleksander Kvasnevskiy muvaffaq bo‘lgan. U mamlakatni 1995-2005 yillar davomida boshqargan.
