«Koronavirusdan uyda davolanish ham bevosita hududiy poliklinikalar kuzatuvi ostida, shifokorlar nazorati ostida amalga oshiriladi. Zinhor biror-bir davolash chorasini tibbiyot xodimlarining maslahatisiz qilish kerak emas.
Sog‘liqni saqlash vazirligi va Sanitariya-epidemiologik osoyishtalik agentligi tomonidan uy sharoitida davolanish bo‘yicha tartib ishlab chiqilgan. Ushbu tartibga muvofiq, bir necha preparatlar, xususan azitromitsin, «Plakvenil» (gidroksixloroxin), lopinavir/ritonavir, remdesivir, umifenovir va favipiravir kabi dorilar tavsiya etiladi.
Bu dorilarning barchasi profilaktika maqsadida, kasallik yuqishining oldini olish uchun ham ishlatilishi mumkinligi aytilyapti. Lekin har qanday holatda ham siz bu kabi dorilarni o‘zingiz emas, tibbiyot xodimlarining tavsiyasiga asosan olishingiz va qabul qilishingiz kerak bo‘ladi.
Sizning eng asosiy vazifangiz – immunitetingizni barqaror ushlab turish uchun imkoniyatlarni ishga solish», degandi epidemiolog AOKAda bo‘lib o‘tgan brifingda.
Bosh davlat sanitariya inspektorining bu so‘zlari ijtimoiy tarmoqlarda muhokamalarga sabab bo‘ldi va ularning aksariyatida mazkur dorilarning profilaktika maqsadida qo‘llanmasligi bildirildi.
Xususan, shifokor Azizbek Boltayev o‘z sahifalarida quyidagi fikrlarni yozib qoldirgan:
«Bosh davlat sanitariya inspektori, professor Nurmat Otabekov ergoferonni profilaktika maqsadida qabul qilishga qarshi chiqdi. Bu uchun rahmat! Lekin bu gap bilan cheklanmasdan u kishi azitromitsin, plakvenil va bir qator virusga qarshi dorilarni profilaktika maqsadida shifokor tavsiyasiga asosan ichish mumkin, deb xato fikr berib o‘tdilar. Gap shundaki, Otabekov o‘z nutqi davomida tilga olgan Covid-19 bo‘yicha milliy davo qo‘llanmasida biror-bir dorini profilaktik maqsadda ichish tavsiya etilmagan, deb aniq yozib qo‘yilgan.
Bunday tavsiyalarni OAV orqali aytganda juda ehtiyot bo‘lish kerak. Chunki halqimizning dorixonaga yugurib kerak-kerakmas dorilarni xarid qilib ichishga moyilligi bor».
Kun.uz muxbiri vaziyatga oydinlik kiritish uchun Nurmat Otabekov bilan bog‘landi.
«Albatta men bunday mazmundagi fikrlarga qo‘shilaman. Brifing paytida dorilarning nomlarini aytish, istasak-istamasak ushbu dorilarni targ‘ib qilishga o‘xshab ketadi. Men epidemiologman, davolovchi shifokor emasman. Shuning uchun xam shifokorlar tavsiyasiga asosan degan fikrni qayta-qayta aytdim.
