Sanepidqo‘m: O‘zbekistonda hantavirus bo‘yicha vaziyat barqaror

Sanepidqo‘m raisi birinchi o‘rinbosari Nurmat Otabekovning aytishicha, hozirgi vaqtda mamlakatda hantavirus bilan bog‘liq xavotirli holat kuzatilmayapti.

Mutaxassislar ta’kidlashicha, Jahon sog‘liqni saqlash tashkiloti ma’lumotlariga ko‘ra, hantavirus koronavirus kabi tez tarqalish xususiyatiga ega emas va global pandemiyaga sabab bo‘lishi ehtimoli past.

Qayd etilishicha, hantavirusning dunyoda 20 dan ortiq turi mavjud bo‘lib, ularning faqat ayrimlari insonlarda kasallik keltirib chiqaradi. Infeksiya asosan Lotin Amerikasi davlatlari — Argentina, Chili va Braziliyada ko‘proq uchraydi. Osiyo va Yevropa mamlakatlarida esa ancha kam holatlar qayd etilgan.

Shu bilan birga, aholiga profilaktik choralarga amal qilish tavsiya etilmoqda. Xususan:

• shaxsiy gigiyena qoidalariga rioya qilish;
• yashash va ish joylarini ozoda saqlash;
• oziq-ovqat mahsulotlarini xavfsiz sharoitda saqlash;
• meva va sabzavotlarni yaxshilab yuvish;
• kemiruvchilar chiqindilarini tozalashdan oldin namlash;
• omborxona va yopiq xonalarni muntazam shamollatib turish.

Shuningdek, endemik hududlarga borib kelgan fuqarolarga bu haqda hududiy oilaviy poliklinikalarga xabar berish tavsiya qilingan.