16:30 / 15.07.2020
9548

«UzReportTV» Pro-liga o‘yinlari translatsiya huquqini qo‘lga kiritdi

Foto: Professional futbol ligasi

O‘zbekiston Professional futbol ligasi hamda «UzReportTV» o‘rtasida Pro-liga musobaqasining media va tijorat huquqlari bo‘yicha shartnoma imzolandi. Mazkur shartnoma 2024 yilning 31 dekabriga qadar amal qiladi. 4 yil davomida «UzReportTV» Pro-liga o‘yinlari translatsiyasi huquqiga egalik qiladi. Bu haqda PFL rasmiy saytida e'lon qilindi.

«UzReportTV» futbol ishqibozlarining milliy futbolimizga bo‘lgan qiziqishlaridan kelib chiqib O‘zPFLga taklif bilan chiqdi. Bir oyga yaqin davom etgan muzokaralar yakunida ikki tomon o‘zaro manfaatli kelishuvga erisha oldi. 

Endilikda, joriy yilning 1 avgustidan boshlab «UzReportTV» Pro-liganing har bir turidan eng qiziqarli va markaziy uchrashuvlarni «UzReportTV» va «FUTBOL TV» telekanallari orqali jonli efirda namoyish etadi. Kelishuvga ko‘ra, uchrashuvlarni jonli translatsiya qilish hajmi yildan yilga ortib boradi. 
 
Pandemiya davrida jismoniy faollik va sog‘lom turmush tarzini targ‘ib qilish yuzasidan harakatlar davom etmoqda. Ammo futbol muxlislarining stadionlarga tashrifi masalasi hozircha kun tartibida emas. Mana shunday sharoitda Pro-liga uchrashuvlarining namoyish etilishi liga manfaatlari uchun xizmat qiladi. Qolaversa, endilikda tomonlar Pro-liga musobaqasi uchun titul va rasmiy homiylar masalasida ham o‘zaro hamkorlik qiladi.

Hamkorlikdagi asosiy masalalardan biri Pro-liga saviyasini ko‘tarish va uni maksimal darajada Superligaga yaqinlashtirishdan iborat. Endilikda Pro-liga klublarida ham o‘zini namoyon etish, mazkur liga futbolchilarida esa terma jamoa murabbiylari nazariga tushish imkoniyati paydo bo‘ladi.

Endilikda «UzReportTV» va «FUTBOL TV» telekanallarida Pro-liga bellashuvlarini jonli efirda, siz sevgan sharhlovchilar bilan birgalikda kuzatib borish imkoni mavjud. Umid qilamiz, bu hamkorlik mamlakat futboli rivoji yo‘lidagi dadil qadamlardan biri bo‘la oladi. «UzReportTV» bilan yangi davr, yangi imkoniyatlar sari birgalikda harakat qilamiz», deyiladi xabarda.

Ma'lumot uchun, o‘zbek futbolidagi rasman ikkinchi divizion hisoblanuvchi Pro-ligada (muqaddam Birinchi Liga deb yuritilgan) 8ta jamoa («Istiqlol», «Zomin», «Xorazm», «Neftchi», «Dinamo», «Oqtepa», «Turon» va «Sho‘rtan») ishtirok etmoqda. Bugun musobaqada 3-tur uchrashuvlari o‘tkaziladi.

Pro-liga bahslari translatsiyasi o‘tgan yil «Sport» telekanalida boshlangan va davom etmay qolgandi. Hozirgacha o‘zbek futbolidagi ikkinchi divizion o‘yinlari translatsiyasi borasida biror kelishuv imzolanmagan va hech bir kanalda bu liga o‘yinlarining doimiy translatsiyasi yo‘lga qo‘yilmagandi.

Top