11:33 / 17.07.2020
5820
Қуйи Чирчиқ тумани ҳокими ўринбосари ва ҳокимликнинг яна икки нафар ходими жаримага тортилди

Ўзбекистон Республикаси президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил девони томонидан Тошкент вилоятининг туман ва шаҳарларида тадбиркорлар томонидан импорт қилинган ускуналарни ишга тушириш аҳволи ўрганилган.

Фото: toshvil.uz

Ўрганиш натижаларига кўра, Қуйи Чирчиқ тумани ҳокимлиги мавжуд муаммоларни аниқлаб уларни бартараф этиш борасида йўлланган мурожаатларга маъулиятсизлик билан ёндошиб келганлиги аниқланган. 

Натижада туман ҳокимининг иқтисод масалалари бўйича биринчи ўринбосари А.Каримжоновга нисбатан маъмурий баённома расмийлаштирилиб, Оққўрғон тумани маъмурий судининг қарори билан унга базавий ҳисоблаш миқдорининг 5 баробари миқдорида маъмурий жарима тайинланган. 

Бундан ташқари, Вакил Девони ходимлари томонидан ўтказилган ўрганишда тадбиркорлик субъектларининг мурожаатларини кўриб чиқиш муддатлари бузилганлиги учун Қуйи Чирчиқ туман архитектори О.Хабибуллаев ва туман хокимлиги масъул ходими Б.Собиржоновларга нисбатан маъмурий баённома расмийлаштирилиб, маъмурий суд қарори билан уларнинг ҳар бирига энг кам ойлик иш хақининг 3 (уч) баробари миқдорида маъмурий жарима белгиланган, деб хабар қилмоқда Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича Вакил девони.

Top