Bosh prokuratura “Shifoxona info” telegram botini ishga tushiradi. U kasalxonalardagi bo‘sh o‘rinlarni aniqlashga yordam beradi

O‘zbekiston Bosh prokurori Nig‘matilla Yo‘ldoshev 15 iyul kuni prezident videoselektoridan so‘ng bergan intervyusida tez tibbiy yordam xizmati yanada kuchaytirilishi, tez tibbiy yordam avtomashinalari tegishli xodimlar bilan 15 daqiqadan ko‘p bo‘lmagan vaqtda chaqiruv bo‘yicha yetib borishi to‘liq ta'minlanishini aytgandi.

Bosh prokuratura matbuot xizmatining Kun.uz’ga ma'lum qilishicha, davlat rahbarining tegishli topshiriqlari ijrosi doirasida bugungi kunga qadar muayyan ishlar amalga oshirilgan. Xususan, koll-markazlar sonini ko‘paytirishda Toshkent shahrining o‘zida qo‘ng‘iroqlarni qabul qilish uchun tez yordam markaziy stansiyasida qo‘shimcha 70ta joy tashkil etilgan.

Bu yerda operatorlik faoliyatini yuritish uchun maxsus o‘quv kurslarda tayyorgarlik ko‘rgan ko‘ngillilar faoliyat yuritmoqda. Bundan tashqari, Toshkent davlat iqtisodiyot universitetida tibbiy maslahat ko‘rsatish bo‘yicha 50 nafar ko‘ngilli shifokorlardan iborat koll-markaz ham o‘z ishini boshlagan.

Toshkent shahar prokuraturasi tomonidan u yerda xizmat o‘tayotgan ko‘ngilli ishchilarga maxsus kiyimlar va bepul kunlik oziq-ovqat yetkazib berilmoqda.

Tez yordam xizmati faoliyatini yaxshilash maqsadida tez yordam markaziy stansiyasi qo‘shimcha 50ta “Damas”, 12ta “Foton” va 27ta “Isuzu” maxsus avtomashinalari bilan ta'minlangan.

Shuningdek, Bosh prokuratura tashabbusi bilan yaqin kunlarda “Shifoxona info” telegram boti tashkil etilib, har bir kasalxonaga prokuratura xodimi biriktirilishi va shahardagi kasalxonalarda mavjud bo‘sh o‘rin (koyka)lar hisobi yuritilishi yo‘lga qo‘yilishi rejalashtirilgan. Bu xizmat chaqiruvga chiqqan tez yordam brigadasini bemorning kasalligi bo‘yicha bo‘sh joy mavjud bo‘lgan yaqin oradagi shifoxonalarga yo‘naltirish imkoniyatini beradi, deyiladi Bosh prokuratura ma'lumotida.