Britaniyada shamol energiyasi 2 yildan so‘ng ko‘mir va gazga qaraganda arzonroq bo‘ladi

Britaniyada qayta tiklanadigan energiya loyihalariga hukumat tomonidan subsidiya beriladi. Bu elektr energiyasi uchun ko‘proq haq to‘lashga majbur bo‘lgan oddiy fuqarolarning noroziligini keltirib chiqardi. Biroq, eng yangi shamol stansiyalari texnologiyalarning rivojlanishi tufayli «salbiy subsidiyalar» bilan ishlashga qodir, ya'ni ular tezda davlatga pulni qaytaradi va aholi uchun elektr energiyasi to‘lovlarining pasayishiga olib kelishi mumkin. Imperiya kolleji mutaxassislari shunday xulosaga kelishdi, deb yozmoqda ZME Science.

«Yaqinda dengiz shamoli energiyasini ishlab chiqarish shunchalik arzonga tushadiki, bunda u qazib olinadigan yoqilg‘ida ishlaydigan elektr stansiyalaridan foydaliroq bo‘ladi va Britaniyadagi eng arzon energiya turiga aylanadi. Odatda, energetika uchun subsidiyalar uy xo‘jaliklariga elektr energiyasi to‘lovlarni oshiradi, lekin bir necha yildan so‘ng qayta tiklanadigan arzon energiya foydaliroq bo‘ladi. Bu ajoyib yutuqdir», - dedi yetakchi tadqiqotchi Malte Yansen.

Yangi shamol stansiyalarini qurish bo‘yicha kimoshdi savdosida ishtirok etayotgan energetika kompaniyalari hukumatga o‘zlari ishlab chiqargan energiyani sotish uchun uzoq muddatli narx belgilamoqda. O‘tgan yili Britaniyada rekord kimoshdi savdosi bo‘lib o‘tdi, unda kompaniyalar ikki yil avvalgiga qaraganda 30 foizga arzonroq bo‘lgan (1 MVt*s uchun taxminan 51 dollar) toza energiya beruvchi dengiz shamoli stansiyasi qurishni taklif qilishdi. 

Mutaxassislar ushbu tendensiyalarni tahlil qilib, barcha ko‘rsatkichlar bo‘yicha shartnoma narxlari pasayishda davom etishini aniqladilar. Shunga o‘xshash tendensiyalar Niderlandiya va Germaniyada ham kuzatilmoqda, ammo Buyuk Britaniya shamol energetikasiga «salbiy subsidiyalar» bergan birinchi mamlakat bo‘lishi mumkin.

Ya'ni, yangi soha nafaqat foyda keltiradi, balki butun mamlakat bo‘ylab iste'molchilar uchun ishlab chiqarilgan energiya narxini sezilarli darajada pasaytirishga imkon yaratadi.

Shamol energiyasini ishlab chiqarish narxlarining pasayishiga shamol stansiyalari texnologiyasining rivojlanishi sababdir: borgan sari kattaroq turbinalar paydo bo‘lmoqda va ular shamol kuchliroq esadigan qirg‘oqlardan uzoqroqqa o‘rnatilmoqda. Tadqiqotchilarning fikricha, Britaniyaning muvaffaqiyatini boshqa mamlakatlarda ham qo‘llash mumkin.

O‘tgan yilning kuzida Britaniyada burilish yuz berdi - butun mamlakat uch oy davomida ko‘mir, neft va gazdan ko‘ra ko‘proq energiyani shamoldan oldi. Dekarbonizatsiya jarayoniga dengiz shamoli fermalarining qurilishi katta hissa bo‘lib qo‘shildi.