Qoʻshimcha funksionallar
-
Tungi ko‘rinish
Falastin BAAdan o‘z elchisini chaqirtirib oldi
Falastin BAA AQSh vositachiligida Isroil bilan tinchlik sulhi tuzishini e'lon qilgandan keyin Amirliklardan o‘z elchisini chaqirtirib olishini e'lon qildi. Bu haqda Falastin tashqi ishlar vaziri Riyoz al-Malikiy bayonotiga tayanib “VAFA” axborot agentligi xabar berdi.
“Falastin davlati prezidenti Mahmud Abbos ko‘rsatmasi bilan Isroil va BAA o‘rtasidagi munosabatlar yaxshilanishi haqidagi bayonotdan keyin zudlik bilan BAAdan Falastin elchisi chaqirtirib olinmoqda”, deb ma'lum qilgan al-Malikiy.
BAA va Isroilning yarashuvini “Falastin milliy ozodligi harakati” (FATH) va XAMAS ham tanqid qilgan.
“Okkupatsiya Falastin xalqining bosh dushmani bo‘lib qolmoqda va biz o‘z kurashimizni davom ettiramiz”, deb va'da bergan XAMAS vakili Abdulatif al-Ko‘nua.
13 avgustda Isroil va BAA o‘zaro diplomatik munosabatlar o‘rnatilishini e'lon qildi. Bu qaror AQSh prezidenti Donald Tramp vositachiligida qabul qilingan. Tegishli hujjat AQShda bir necha hafta ichida imzolanishi kutilmoqda. Isroil bunda ko‘ngilli tarzda Iordan daryosining g‘arbiy qirg‘og‘idagi katta hududlar anneksiyasidan voz kechadi.
Isroil bosh vaziri Binyamin Netanyaxu shu munosabat bilan Isroil va arab dunyosi o‘rtasida “yangi davr boshlanishini” aytgan. Shu bilan birga, u Isroil Iordanning g‘arbiy qirg‘og‘iga o‘z da'volaridan voz kechmasligini va faqatgina bu rejalarini ortga surayotanini ta'kidlab o‘tgan.
Isroil va BAA o‘rtasida munosabatlar yaxshilanishi Yaqin Sharq muammosini hal qilishning Tramp ilgari surgan rejasini amalga oshirishdagi navbatdagi bosqich hisoblanadi. Bu reja Isroilga Iordanning g‘arbiy qirg‘og‘idagi katta hududlarni, jumladan Iordan vodiysini qo‘shib olishga “yashil chiroq” beradi. Falastin bu rejaga qat'iyan qarshi chiqmoqda.
