Termizda Italiya-O‘zbekiston savdo uyi ochiladi

Ochilish marosimi joriy yil 25 avgust kuni bo‘lib o‘tishi rejalashtirilgan.

Foto: Tashqi ishlar vazirligi matbuot xizmati

2020 yilning 24 avgust kuni O‘zbekiston tashqi ishlar vaziri Abdulaziz Komilov Italiyaning favqulodda va muxtor elchisi etib tayinlangan Agostino Pinnani qabul qildi.

TIV xabariga ko‘ra, suhbat chog‘ida ikki mamlakat o‘rtasidagi o‘zaro manfaatli hamkorlikni yanada mustahkamlashning dolzarb masalalari muhokama qilindi.

Tomonlar turli darajadagi bo‘lajak qo‘shma tadbirlarni o‘tkazish vaqti bo‘yicha fikr almashdilar.

Ta'kidlanganidek, O‘zbekiston tomoni Italiya bilan savdo-iqtisodiy va sarmoyaviy hamkorlikni rivojlantirishga alohida e'tibor qaratmoqda. Shu nuqtayi nazardan, tomonlar aniq loyihalarni, shuningdek, ushbu yo‘nalishda ilgari erishilgan ustuvor vazifalar, xususan, 2019 yil may oyida Rimda bo‘lib o‘tgan Hukumatlararo ishchi guruhining 6-yig‘ilishi doirasidagi kelishuvlarni amalga oshirishdan manfaatdor ekanliklarini bildirdilar.

Qayd etilganidek, joriy yil 25 avgust kuni ochilish marosimi bo‘lib o‘tishi rejalashtirilgan Termiz shahridagi «Veneto» savdo uyi ikki mamlakat ishbilarmon doiralari o‘rtasidagi aloqalarni yanada kengaytirishga xizmat qiladi.

Uchrashuvda madaniy-gumanitar sohadagi aloqalarni rivojlantirish masalalariga alohida e'tibor qaratildi.

Muzokaralarda tomonlarni qiziqtirgan boshqa masalalar ham ko‘rib chiqildi.