Olim Ispaniyada koronavirusning ikkinchi to‘lqini boshlanganini ma'lum qildi

Olimning ta'kidlashicha, Ispaniyada 15 maydan keyin bungacha bo‘lgan davrga nisbatan koronavirusga chalinganlar ko‘proq aniqlangan. Bu esa ikkinchi to‘lqin yuz berayotganidan darak beradi. Ikkinchi to‘lqin birinchisiga nisbatan o‘zgacha kechmoqda: bunda infeksiya ko‘proq yoshlarda qayd qilinmoqda va kasallik virus kuchsizlangani sababli yengil shaklda o‘tmoqda. Mutaxassisning aytishicha, avval tashxislarning katta qismi shifoxonalarda qo‘yilgan va bunda kasallanganlar asosan katta yoshlilar bo‘lgan. Hozirda esa ommaviy testlar o‘tkazilayotgani evaziga bemorlar kasallikning erta bosqichida aniqlanmoqda. Shu sababli tashxislarning aksariyati shifoxonalardan tashqarida qo‘yilmoqda.

Olimning ta'kidlashicha, ayni vaqtda vaziyatning qanday tus olishini prognoz qilish qiyin, biroq qat'iy karantinga qaytishga hojat yo‘qligiga umid bor. Chunki xavf guruhiga kiruvchi odamlar kasallikka chalinishdan qo‘rqib, aloqalarni cheklamoqdalar va o‘zlarini himoya qilmoqdalar.

25 avgustda Ispaniya bosh vaziri Pedro Sanches mamlakatda virus bilan bog‘liq vaziyat “xavotir uyg‘otayotganini”, biroq mart oyidagi kabi og‘ir emasligini aytgan.

Ispaniyada pandemiya boshidan beri kasallanganlar soni 412 mingdan oshdi, 30 mingga yaqin odam virusdan vafot etdi. Ayni vaqtda Ispaniyaning butun hududi bo‘ylab majburiy niqob taqish va boshqa sanitar choralar amal qilmoqda.