Samarqand tomondan Toshkentga yo‘l olgan yuk mashinalari Sirdaryo tumanini aylanib o‘tishadi

Toshkent – Samarqand yo‘nalishining Sirdaryo viloyati hududidan o‘tgan qismida yuk mashinalarining harakat yo‘nalishiga o‘zgartirish kiritiladi, deb xabar bermoqda Kun.uz’ga viloyat IIB YHXB.

M34 “Toshkent-Dushanbe” avtomobil yo‘lining Sirdaryo tumanidan o‘tuvchi 90-kilometrida joylashgan “Sho‘razak” kollektori ustidagi temirbeton ko‘prikning yuk ko‘tarish qobiliyati pasayib, ta'mirtalab holga kelib qolgan.

Kelgusida sodir bo‘lishi mumkin bo‘lgan ko‘ngilsiz hodisalarning oldini olish maqsadida, og‘ir yuk tashuvchi transport vositalarining ushbu ko‘prik orqali harakatlanishi taqiqlanib, vaqtinchalik ushbu turdagi transport vositalari harakatlanish yo‘nalishi o‘zgartirildi.

Ya'ni, xalqaro ahamiyatdagi M39 avtomobil yo‘lining 871-kilometri orqali Sirdaryo viloyati hududiga kirib kelgan og‘ir turdagi yuk transport vositalari qatnovi 4R26 “Sirdaryo – Dehqonobod – Qiyot – Bekobod” yo‘nalishi bo‘yicha A373 “M39 avtoyo‘li – Guliston – Bo‘ka – Angren – Qo‘qon va Andijon orqali O‘sh” avtomobil yo‘lining 58-kilometriga chiqib harakatlanishni davom ettirishlari mumkinligi belgilandi.

Shu bilan birga, 2 oy muddatda ushbu temir beton ko‘prikni bir tomonini avtotransport vositalari qatnovi uchun ta'mirlab foydalanishga topshirish uchun Sirdaryo viloyati avtomobil yo‘llari hududiy bosh boshqarmasiga yuklatilgan.

4 oy muddatda esa ko‘prikni to‘liq foydalanishga topshirilishi belgilangan.