Toshkent davlat texnika universiteti talabalari Kun.uz'ga murojaat bilan chiqdi. Ular universitet huzurida qurilgan davlat-xususiy sheriklik asosidagi talabalar yotoqxonasida yashab kelishgan va yotoqxona uchun toʻlovni amalga oshirishgan. Lekin 5-oktabr kuni talabalarga yotoqxonani boʻshatish buyurilgan, 6-oktabr kechki payt esa 300 nafar talaba binodan chiqarib yuborilgan. Koʻchaga haydalganlar orasida qizlar ham bor.
“Biz viloyatdan kelib oʻqiymiz. Yotoqxona uchun pulni oldindan toʻlaganmiz. Lekin kecha bizga yotoqxonani bir kun ichida boʻshatish haqida aytildi. 6-oktabrda esa hamma talabani chiqarib yuborishdi. Bu yotoqxona davlat-xususiy sheriklik asosida tashkil etilgani, lekin hali litsenziya olmagani aytildi. Yotoqxona uchun pulni toʻlagan boʻlsak, endi qayerga borishimizni soʻraganimizda, “bizga tepadan buyruq berilgan”, deyishdi.
Kech soatda taxminan 300 nafar talabani chiqarib yuborishdi. Universitet prorektori, prokuratura xodimi va uchastka inspektori kelib, yotoqxonani boʻshatishimiz kerakligini aytdi. Biz “borib turadigan joyimiz yoʻq, koʻchada qolamizmi?” deb soʻradik. Ammo aniq yechim taklif qilinmadi. Puli borlar hostelga, tanishi borlar tanishinikiga ketdi. Oramizda qizlar bor, ular qayerga boradi tunda?
Biz pul toʻlaganmiz. Agar yotoqxonaning litsenziyasi boʻlmagan boʻlsa, bu masala nega talabalar joylashtirilib, ulardan pul olingandan keyin aniqlanyapti? Endi biz qayerda yashaymiz, toʻlagan pulimiz nima boʻladi?
Bu masalani Oliy taʼlim vazirligi orqali hal qilishga harakat qildik. Ammo ular bu masalani hal qila olmasligini, litsenziya boʻlmasa, buni ichki ishlar organlari hal qilishini aytdi. Biz esa hozir qayerga borishimizni bilmaymiz”, – deydi talabalar.
Kun.uz holat yuzasidan Taʼlim va ilm-fan vazirligiga bogʻlandi. Vazirlik quyidagicha izoh berdi:
“Toshkent shahri Talabalar shaharchasida Toshkent davlat texnika universiteti bilan davlat-xususiy sheriklik asosida qurilgan talabalar turar joyi hozircha rasman foydalanishga topshirilmagan.
Mazkur obyektning kadastr hujjatlari hali rasmiylashtirilmagan hamda undan foydalanish uchun zarur tegishli ruxsatlar olinmagan. Shu sababli obyektga talabalarni rasmiy tartibda joylashtirish imkoni mavjud emas.
Amaldagi tartibga koʻra, talabalar turar joyiga joylashish uchun talaba Davlat xizmatlari markazlari yoki my.gov.uz portali orqali ariza topshiradi hamda belgilangan tartibda yoʻllanma olganidan soʻng turar joyga joylashtiriladi.
Biroq tadbirkor tomonidan mazkur obyektda ayrim talabalar belgilangan tartibga rioya etilmagan holda, tegishli yoʻllanmasiz joylashtirilgani aniqlandi. Shuningdek, Toshkent davlat texnika universitetiga tegishli boʻlmagan boshqa oliy taʼlim tashkilotlari talabalarining ham ushbu obyektga joylashtirilgan holatlari kuzatilgan.
