6-oktabr kuni kunduzgi soatlarda Toshkent shahrining katta qismida havo sifati xalqaro havo sifati indeksi (AQI) boʻyicha «oʻrtacha» darajada boʻldi. Soat 20:00 dan keyin esa havo sifati yomonlashib, kechasi va ertalab «sezgir guruhlar uchun noqulay» daraja kengroq hududlarni qamrab oldi. Ayrim hududlarda qisqa muddatli «nosogʻlom» daraja ham kuzatildi. Bu haqda Ekologiya qoʻmitasi xabar berdi.
Qayd qilinishicha, 6-oktabr soat 17:00 dan 7-oktabr soat 10:00 gacha boʻlgan kuzatuvlarga koʻra, Toshkentda PM2,5-mayda zarrachalarining oʻrtacha miqdori 43,5 mkg/m³, PM10 zarrachalarining oʻrtacha miqdori 97,2 mkg/m³ ni tashkil etgan.
Ushbu davrda AQI boʻyicha shaharning oʻrtacha koʻrsatkichi 117 boʻlib, «sezgir guruhlar uchun noqulay» darajaga mos kelgan.
Milliy indeksatsiya boʻyicha esa PM2,5 «yashil», PM10 «sariq» darajada qayd etilgan. 7-oktabr soat 10:00 da PM10 boʻyicha shaharning oʻrtacha koʻrsatkichi «zargʻaldoq» darajaga koʻtarilgan.
Havo sifatining yomonlashishiga ifloslantiruvchi moddalar tarqalib ketishini cheklagan noqulay meteorologik sharoitlar taʼsir qilgan. Xususan, shamol tezligi 1 m/s atrofida boʻlgani va tunda kuchli harorat inversiyasi kuzatilgani havoning almashinuvi hamda vertikal aralashishini susaytirgan.
Kuzatuvlarga koʻra, 6-oktabr soat 23:00 dan 7-oktabr soat 8:00 gacha harorat inversiyasi qayd etilgan. Inversiya qatlamidagi harorat farqi 1,8–6,7 °C ni tashkil etgan.
Bunday sharoitda yerga yaqin sovuq havo ustida nisbatan iliq havo qatlami hosil boʻlib, ifloslantiruvchi moddalarning yuqoriga tarqalishi cheklanadi.
Mutaxassislar bunday holatlar hafta oxirigacha asosan tungi va ertalabki vaqtlarda qisqa muddatli kuzatilishi mumkinligini bildirmoqda.
Hozir atmosfera havosi sifati Maxsus komissiya tomonidan doimiy monitoring qilinmoqda.
Maʼlumot uchun: Oʻzbekistonda PM2,5 va PM10 zarrachalari boʻyicha havo sifatini baholashning milliy indeksatsiya tizimi ishlab chiqilgan. U Sogʻliqni saqlash vazirligi hamda Ekologiya va iqlim oʻzgarishi milliy qoʻmitasining qoʻshma qarori asosida joriy etilgan.
