Rossiyada chet elliklarga barmoq izlarini topshirish va elektron ID olish talabi qo‘yilishi mumkin

Rossiya IIV migratsiya qonunchiligini isloh qilish konsepsiyasi va «Rossiya Federatsiyasida xorijiy fuqarolarning huquqiy maqomi to‘g‘risida»gi qonunning yangi tahririni taqdim etdi. Ularga muvofiq, Rossiyada barcha muhojirlardan barmoq izlarini olish rejalashtirilmoqda, deb xabar beradi «Kommersant'» IIV Migratsiya masalalari bo‘yicha bosh boshqarmasi boshlig‘i Valentina Kazakovaning Jamoatchilik palatasidagi nutqiga asoslanib. 

IIV, xususan, Rossiyada 30 kundan ortiq vaqt davomida bo‘lgan barcha muhojirlarga barmoq izlari, fotosurat, tibbiy ko‘rikdan o‘tishi va ID-kartalarni olish majburiyatini yuklamoqchi. Kazakova Rossiyaga kirib kelganlarning hammasidan barmoq izlarini olish g‘oyasi bir necha yildan beri muhokama qilinayotganini ta'kidladi. Biroq, ilgari barmoq izlarini chegarada olish va buning uchun barcha postlarda tegishli uskunalarni o‘rnatish g‘oyasi ko‘rib chiqilgan bo‘lsa, IIV endi muhojirlarning o‘ziga kelganidan keyin barmoq izlarini mustaqil ravishda topshirish majburiyatini yuklashni taklif qilmoqda.

Kazakovaning aytishicha, IIV muhojirlarga Rossiyadan kirish maqsadini mamlakatni tark etmasdan o‘zgartirish imkoniyatini berishni taklif etmoqda. Hozir kirish maqsadini faqat bir marta belgilash mumkin. Mahkama migratsiya qog‘ozlarini elektron kartalarga almashtirish niyatida. Shuningdek, ish beruvchilarning yagona elektron reyestrlari paydo bo‘ladi. Rossiyada bunday reyestr tufayli xorijiy ishchi kuchiga kvotalar tizimidan voz kechish hamda buning o‘rniga chet ellik ishchilar va ish beruvchilar bir-birini qidirib, elektron tizim orqali hujjatlarni rasmiylashtirishi mumkin bo‘ladi.

Bundan tashqari, Rossiyada vaqtinchalik yashash uchun ruxsatnoma (VYaR) berishni tugatish rejalashtirilmoqda. «Biz hozirdagi kabi vaqtinchalik yashash uchun ruxsatnoma olish institutidan voz kechish niyatidamiz», - dedi u. Hozir VYaR uch yilga beriladi, uzaytirilmaydi va butun amal qilish muddati davomida Rossiyada bo‘lishga imkon beradi. Shuningdek, u Rossiyada patent va ishlash uchun ruxsatnomasiz ishlash huquqini beradi. VYaRni olganidan so‘ng, chet el fuqarosi yashash uchun ruxsatnoma (YaUR) olish maqsadida murojaat qilishi mumkin.

IIV buning o‘rniga uchta migratsiya rejimi joriy etishni taklif qilyapti: qisqa muddatli yashash (90 kungacha), uzoq muddatli yashash va doimiy yashash. Oxirgi ikkitasi, «Kommersant'»ning ta'kidlashicha, VYaR va YaURni almashtirishi kerak.