Xorijiy kinokompaniyalar O‘zbekiston hududida qilgan xarajatlarning bir qismi qaytarib beriladi

Adliya vazirligi xabariga ko‘ra, endilikda xorijiy kinokompaniyalarga respublika hududida qilgan xarajatlarining 20 foizi (biroq 300 ming AQSh dollaridan oshmagan miqdorda) davlat budjeti mablag‘lari hisobidan qaytariladi.

Bunda, xorijiy kinokompaniya respublika hududida filmlarni suratga olish uchun «O‘zbekkino» milliy agentligidan ruxsatnoma oladi hamda hamkorlik bo‘yicha Memorandum imzolanadi.

Xorijiy kinokompaniya respublika hududida filmlarni suratga olish uchun O‘zbekistondagi tijorat banklarida maxsus hisob raqami ochadi va xarajatlarni shu orqali amalga oshiradi.

Ruxsatnoma muddati yakunlangandan so‘ng filmni suratga olish ishlari yakunlangan hisoblanadi.

Xarajatlarni qaytarish uchun tegishli hujjatlar Moliya vazirligiga taqdim etiladi va vazirlik tomonidan 10 kun muddatda qaror qabul qilinadi.

«O‘zbekkino» – xorijiy kinokompaniyalarga xarajatlar qismini qaytarishni muvofiqlashtiruvchi mas'ul davlat organi etib belgilandi.

Davlat budjetidan mablag‘ ajratilgan xorijiy kinokompaniyalar ro‘yxati agentlik veb-saytiga joylashtiriladi.