28 iyul kuni bo‘lib o‘tgan ovoz berishda Jyey Kleyton AQSh Milliy razvedkasi direktori lavozimiga rasman tasdiqlandi. Uning nomzodini prezident Donald Tramp iyun oyida Senatga taqdim etgan edi.
AFP agentligi ma’lum qilishicha, dastlab demokratlar Kleyton nomzodini Milliy razvedka rahbari vazifasini vaqtincha bajaruvchi Uilyam Pultega nisbatan maqbulroq variant sifatida baholagan. Biroq Senatdagi eshituvlar davomida ularning munosabati o‘zgardi.
Xususan, demokrat senatorlar Kleytondan 2020 yilgi prezidentlik saylovida Jo Bayden g‘olib bo‘lganini tan oladimi, degan savolni bir necha bor bergan. Kleyton esa Bayden saylov g‘olibi sifatida “e’tirof etilgani“ni aytgan, ammo to‘g‘ridan to‘g‘ri javob berishdan tiyilgan. Donald Tramp esa bir necha yildan buyon ushbu saylov natijalari soxtalashtirilganini da’vo qilib keladi, biroq bu iddaolarni tasdiqlovchi dalillar mavjud emas.
Jyey Kleyton 2025 yildan beri Nyu-York janubiy okrugi federal prokurori sifatida faoliyat yuritib kelgan. U bir qator shov-shuvli ishlarga rahbarlik qilgan, jumladan, Venesuelaning sobiq rahbari Nikolas Maduroga nisbatan giyohvandlik moddalari noqonuniy aylanmasi bo‘yicha tergovni ham nazorat qilgan.
Shunga qaramay, Kleytonning razvedka yoki milliy xavfsizlik sohasida amaliy tajribasi yo‘q. Endi u AQShning razvedka hamjamiyatini boshqaradi. Ushbu tizim tarkibiga 18 ta idora, jumladan, Markaziy razvedka boshqarmasi (CIA), Milliy xavfsizlik agentligi (NSA) va Mudofaa vazirligi razvedka boshqarmasi (DIA) kiradi.
Avvalgi Milliy razvedka direktori Tulsi Gabbard may oyida turmush o‘rtog‘ining og‘ir kasalligi sabab lavozimini tark etgan edi. Shundan so‘ng Donald Tramp vazifani vaqtincha Uilyam Pultega yuklagan. Ammo uning razvedka sohasida tajribasi yetarli emasligi ikki partiya vakillari tomonidan tanqid qilingan.
AFP ma’lumotlariga ko‘ra, Pulte qisqa muddatli rahbarligi davomida Donald Trampning ayrim siyosiy raqiblariga nisbatan jinoiy ta’qib masalasini ko‘rib chiqish uchun materiallar yuborish tashabbusi bilan chiqqan hamda Milliy razvedka direktori apparatida keng ko‘lamli qisqartirishlarni amalga oshirgan. Uning ma’lum qilishicha, beshinchi bosqich qisqartirishlardan keyin idora markaziy apparati xodimlari soni qariyb 30 foizga kamaytiriladi.
Jyey Kleyton ilgari AQSh Qimmatli qog‘ozlar va birjalar komissiyasi (SEC) raisi sifatida ham ishlagan. Shuningdek, u Sullivan & Cromwell yuridik firmasida faoliyat yuritib, huquq sohasida katta tajriba orttirgan.
