Kambag‘allikni aniqlashda ishsizlik darajasi inobatga olinadimi? Obid Hakimov izohi

“Kambag‘allikka qarshi kurashishda kambag‘allikka tushgan odamga ish va daromad berish orqali uni kambag‘allikdan chiqarish haqida gapirmayapmiz. Bu yerda davlatimiz rahbari tomonidan qo‘yilgan asosiy maqsad – kompleks ravishda kambag‘allikka qarshi kurashish. Kompleks ravishda kurash yuz bermas ekan, o‘sha odamni yana kambag‘allik qopqoniga qaytib kelishiga sababchi bo‘lib qolasiz.

Masalan, faqat ish berilsa, lekin sog‘liqni saqlash, ta'lim, uydagi holat, urbanizatsiya bilan bog‘liq bo‘lgan masalalar hal qilinmasa, odamlarni kambag‘allikdan olib chiqib ketish juda qiyin bo‘ladi. Shuning uchun bu yerda faqat ishsizlik emas, balki hamma narsa inobatga olinadi”, - deya Obid Hakimovning so‘zlarini keltirmoqda Kun.uz muxbiri.

Iqtisodiy tadqiqotlar va islohotlar markazi direktori kambag‘allikni o‘rganishda aynan Bo‘ka va Chinoz tumanlari sinov tariqasida tanlab olingani sabablari haqida ham gapirdi.

“Bittasi [Chinoz] o‘rtaholroq tuman, yana bittasi [Bo‘ka] davlat tomonidan qo‘llab-quvvatlanadigan tuman bo‘lgani uchun o‘sha yerda o‘zimizning pilot loyihalarimizni boshladik. Bu loyiha doirasida hozir 1100dan ortiq “Temir daftar”ga kiritilgan xonadonlarga kirib, ularning holati o‘rganib chiqildi. U yerda faqat uyning holati emas, balki sog‘liqni saqlash, bolalarning o‘qishi, rivojlanishi, uydagi sanitariya holati, tomorqa uchastkalaridan samarali foydalanish kabi jihatlar o‘rganildi. Bu o‘ttiz varaqdan ortiq so‘rovnoma va u yerda turli ijtimoiy-iqtisodiy ko‘rsatkichlar bor. Dastlabki tahlillarni boshladik”, - dedi Obid Hakimov.

Avvalroq, kambag‘allik o‘lchovlari to‘g‘risida ma'lumot berilgandi.