«Adolat» markazining asosiy vazifalari belgilandi

Vazirlar Mahkamasining “O‘zbekiston Respublikasi Adliya vazirligi qoshidagi “Adolat” milliy huquqiy axborot markazi faoliyatini tashkil etish, shuningdek aholining huquqiy madaniyatini yuksaltirishga doir ishlar samaradorligini oshirish chora-tadbirlari to‘g‘risida” qarori qabul qilindi.

Norma’ning yozishicha, prezidentning "Davlat huquqiy siyosatini amalga oshirishda adliya organlari va muassasalari faoliyatini yanada takomillashtirish chora-tadbirlari to‘g‘risida"gi farmoniga muvofiq:

“Adolat” huquqiy axborot markazi" davlat muassasasi, "Inson va qonun" gazetasi tahririyati" DUK hamda "Huquq va burch" ijtimoiy-huquqiy jurnali" tahririyatini birlashtirish yo‘li bilan ularning negizida vazirlik qoshida davlat muassasasi shaklidagi "Adolat" milliy huquqiy axborot markazi tashkil etilgan;

Markaz aholi va ijrochilarga jamiyatda aholining huquqiy ongi va huquqiy madaniyatini yuksaltirishga qaratilgan huquqiy axborotlarni hamda targ‘ibot materiallarini tayyorlash va tezkor tarqatish, shuningdek, normativ-huquqiy hujjatlar matnlarini rasmiy e'lon qilish sohasida respublikaning yetakchi davlat muassasasi hisoblanadi;

“Inson va qonun” gazetasi hamda "Huquq va burch" ijtimoiy-huquqiy jurnali tahririyatlari amaldagi xizmat ko‘rsatish sohalarini saqlab qolgan holda faoliyat yuritadi va o‘z mablag‘lari hisobidan moliyalashtiriladi, ushbu mablag‘larning yetishmagan qismi esa Adliya vazirligining budjetdan tashqari mablag‘lari hisobidan qoplanadi.

Markazning asosiy vazifalari:

Qonun hujjatlari ma'lumotlari milliy bazasini yuritish;
normativ-huquqiy hujjatlar matnlarining hamda zarur bo‘lgan taqdirda, tegishli axborot-tahliliy materiallarning Vazirlar Mahkamasi tomonidan belgilanadigan ro‘yxat bo‘yicha barcha davlat organlariga va tashkilotlarga elektron shaklda yuborilishini ta'minlash;
Milliy bazani takomillashtirish bo‘yicha takliflar ishlab chiqish va amalga oshirish;
aholining huquqiy ongi va huquqiy madaniyatini yuksaltirish bo‘yicha manzilli va predmetli huquqiy targ‘ibot tadbirlarini amalga oshirish, shuningdek davlat organlari va tashkilotlar bilan birgalikda normativ-huquqiy hujjatlarning norma va qoidalarini aholiga tushuntirish bo‘yicha namunaviy hujjatlar to‘plamini tayyorlash;
aholining huquq va majburiyatlarini tushuntirishga yo‘naltirilgan zarur targ‘ibot materiallarini tayyorlash va tarqatish, shuningdek dolzarb va aholini qiziqtirgan savollar bo‘yicha;
normativ-huquqiy hujjatlarning mohiyatini hamda mamlakatda amalga oshirilayotgan islohotlarning ahamiyatini keng yoritish bo‘yicha tezkor axborot-tahliliy media materiallarni, shu jumladan, audio- va videoroliklar, ijtimoiy reklamalar, mahalliy hisobotlarni tayyorlash;
rasmiy nashrlar - "O‘zbekiston Respublikasi qonun hujjatlari to‘plami", "O‘zbekiston Respublikasining xalqaro shartnomalar to‘plami"ning, davriy nashrlar - "Inson va qonun" gazetasi, "Huquq va burch" ijtimoiy-huquqiy jurnalining hamda boshqa nashrlar - yuridik adabiyotlar, jumladan yuridik darsliklar, sharhlar va turli qo‘llanmalarni tayyorlash va chop etilishini ta'minlash;
yuridik va jismoniy shaxslarning, xorijiy mamlakatlar tashkilotlarining buyurtmasiga ko‘ra shartnoma asosida O‘zbekiston, xorijiy mamlakatlar qonunchiligi to‘g‘risida axborot taqdim etish;
faoliyat turi bo‘yicha tovarlar (ishlar, xizmatlar) ishlab chiqarish, sotish hamda xizmatlar ko‘rsatish;
NNH loyihalari hamda boshqa huquqiy va boshqaruv hujjatlari namunalarini tayyorlash, shuningdek ijtimoiy-huquqiy axborotlarni keng yoritishga qaratilgan media materiallarni tayyorlash bo‘yicha shartnoma asosida konsalting xizmatlarini ko‘rsatish;
metodik yordam ko‘rsatish va davlat boshqaruvi organlari, mahalliy boshqaruv organlari faoliyatini muvofiqlashtirish.