«Hunar orqali kamu ko‘stimiz bitadi, birovga muhtojligimiz yo‘q» - namanganlik ro‘mol to‘quvchi ayol 

Tepaqo‘rg‘onning Bo‘ston mahallasida yashovchi Nargiza Mahkamova ham ana shunday qo‘ligul hunarmandlardan biri. U 10 yoshidan beri ro‘mol to‘qiydi. 

Qahramonimiz mana shu hunari orqali kimgadir nafi tegayotganidan juda mamnun, asosiy daromadini ham shu mehnati orqali topadi.

Uning aytishicha, bir kilo echki yungidan o‘rtacha 10 dona ro‘mol tayyorlanadi. Qahramonimiz haftasiga o‘rtacha 5 dona ro‘mol to‘qiydi. Bitta ro‘molning narxi yozda 40-45 ming, qishda esa  37-40 ming atrofida sotiladi.

Haftaning  har chorshanba kunida tayyor mahsulotlar xaridorlar tomonidan uydan olib ketiladi. Bir oyda o‘rtacha 100 tagacha ro‘molga buyurtma tushadi, chunki bu issiq va momiq ro‘mollar Qozog‘iston va Rossiya mamlakatlarida xaridorgir hisoblanadi. Mana shunday talab yuqori bo‘lgan paytda qahramonimiz oila a'zolari, kelinlar bilan birgalikda ro‘mollarni to‘qib, bitirishga harakat qiladi.

Yungni sotib olib kelishdan boshlab, yigirish va to‘qishgacha bo‘lgan jarayon qahramonimizga o‘zgacha zavq bag‘ishlaydi. 

«Muhimi, halol mehnat ro‘zg‘orga baraka olib keladi, mana shu hunar orqali kamu ko‘stimiz bitadi, birovga muhtojligimiz yo‘q, shu kasbimdan g‘ururlanaman», — deydi mohir qo‘l sohibasi.

Yulduz Yuldasheva tayyorladi.