Tadbirkorlik sohasida «aqlli nazorat» modeli joriy qilinadi

Prezidentning “Tadbirkorlik sohasida davlat nazoratining sifati va ko‘lamini tubdan takomillashtirish chora-tadbirlari to‘g‘risida”gi farmoni loyihasi e'lon qilindi. 

Quyidagilar tadbirkorlik sohasida davlat nazoratini isloh qilishning ustuvor yo‘nalishlari etib belgilanadi:

fuqarolarning huquq va qonuniy manfaatlariga, sog‘lig‘iga, jamoat va davlat xavfsizligiga zarar yetkazmaydigan faoliyat turlarini nazorat qilish bilan bog‘liq funksiyalarni maqbullashtirish hamda samarasiz nazorat funksiyalar amalga kiritilishining oldini olish mexanizmlarini joriy qilish;

axborot texnologiyalarini keng qo‘llagan holda “aqlli nazorat” modelini joriy qilish, sohaga oid barcha ma'lumot va jarayonlarni raqamlashtirish, “xavfni tahlil qilish” tizimi yordamida davlat nazoratini ustuvor ravishda “elektron inspektor” usulida amalga oshirish amaliyotini yo‘lga qo‘yish;

huquqbuzarliklarning oldini olish standartini joriy etish, normativ-huquqiy hujjatlarda nazarda tutilgan majburiy talablarga insofli rioya etilishini rag‘batlantirish mexanizmlarini yo‘lga qo‘yish;

davlat nazoratini amalga oshirish bilan bog‘liq ma'lumotlar ochiqligi va ommabopligini ta'minlash, korrupsiya, manfaatlar to‘qnashuvi, shuningdek normativ-huquqiy hujjatlar normalarining tanlab qo‘llanilishi holatlari oldini olish;

mansabdor shaxslarning davlat nazoratini amalga oshirishda qonuniylikni ta'minlash uchun yetarli bilim, malaka va ko‘nikmaga ega bo‘lishiga oid alohida talablarni belgilash.