Yuridik kadrlarni xalqaro standartlar bo‘yicha professional o‘qitish markaziga qo‘shimcha vazifalar yuklatiladi

Vazirlar Mahkamasining “Yuridik kadrlarni xalqaro standartlar bo‘yicha tayyorlash tizimini yanada takomillashtirish bo‘yicha qo‘shimcha chora-tadbirlar to‘g‘risida”gi qarori loyihasi e'lon qilindi.

Toshkent davlat yuridik universiteti huzuridagi Yuridik kadrlarni xalqaro standartlar bo‘yicha professional o‘qitish markaziga quyidagi qo‘shimcha vazifalar yuklatilishi mumkin:

davlat xalq ta'limi, o‘rta maxsus va professional ta'lim muassasalarida yuridik fanlardan dars beradigan, oliy noyuridik ma'lumotga ega pedagog kadrlarni qayta tayyorlash;

nizolarni sudgacha muqobil hal qilish mexanizmi sifatida mediatsiya institutida samarali faoliyat yuritadigan mediatorlarni tayyorlash;

tinglovchilarning intellektual mulk sohasiga oid kasbiy bilim va ko‘nikmalarni oshirish bo‘yicha qisqa muddatli o‘quv kurslari tashkil etish;

yosh advokatlarning tanlov orqali yetakchi xorijiy yuridik kompaniyalarda stajirovka o‘tashini tashkil etish.

Belgilanishicha:

a) 2030 yil 1 yanvardan boshlab davlat xalq ta'limi, o‘rta maxsus va professional ta'lim muassasalarida huquqiy fanlardan faqat oliy yuridik ma'lumotga ega bo‘lgan yoki Markazda pedagogik qayta tayyorlash kurslarini tugatgan va belgilangan namunadagi diplom olgan oliy ma'lumotli shaxslar dars berish huquqiga ega bo‘ladi;

b) oliy ma'lumotga ega bo‘lgan shaxslarni yuridik mutaxassislikka qayta tayyorlash kurslarini muvaffaqiyatli tugatib, belgilangan namunadagi diplom olgan shaxslar tegishli mutaxassislik bo‘yicha davlat organlari va tashkilotlarning yuridik xizmati bilan bir qatorda Fuqarolik holati dalolatnomalarini yozish organlari hamda davlat xizmatlari markazlarida ishlash huquqiga ega bo‘ladi;

v) tadbirkorlar, davlat organlari va tashkilotlar vakillari, oliy ta'lim va ilmiy-tadqiqot muassasalari xodimlarini intellektual mulkni yaratish va himoya qilish asoslari, tijoratlashtirish, brending va marketingga o‘qitish Toshkent davlat yuridik universiteti (TDYuU) va boshqa oliy ta'lim muassasalari yuridik fakultetlarida qisqa muddatli o‘quv kurslarini tashkil etish orqali TDYuU kengashi tomonidan belgilangan tartibda amalga oshiriladi;

g) qarorda nazarda tutilgan o‘quv kurslari bevosita, masofaviy (ishdan ajralmagan holda) yoki boshqa shakllarda tashkil etilishi mumkin.

Adliya vazirligining Advokatlar palatasi bilan birgalikda yosh advokatlarning tanlov orqali yetakchi xorijiy yuridik kompaniyalarda stajirovka o‘tashini tashkil etish uchun davlat grantlarini ajratish haqidagi takliflari ma'qullanishi mumkin.

Belgilanishicha:

a) 2021 yil 1 iyuldan boshlab:

yosh advokatlarning xorijiy yuridik kompaniyalarda stajirovka o‘tashini tashkil etish bilan bog‘liq xarajatlar davlat grantlarini jalb etish orqali ham amalga oshiriladi;

Markazda Yuridik kadrlarni xalqaro standartlar bo‘yicha professional o‘qitish kurslarini muvaffaqiyatli tamomlagan hamda zimmasiga ikki yil davomida O‘zbekiston hududida advokatlik faoliyati bilan shug‘ullanish majburiyatini olgan tinglovchilar orasidan xorijiy yuridik kompaniyalarda uch oygacha bo‘lgan muddatda stajirovka o‘tash uchun har yili 5 nafargacha yosh advokat Adliya vazirligi tomonidan Advokatlar palatasi bilan birgalikda tashkil etiladigan komissiya tomonidan tanlov asosida saralab olinadi;

b) Markaz direktori tomonidan TDYuU bilan kelishilgan holda Markazning budjetdan tashqari (o‘qish uchun tushgan mablag‘lar va boshqa) mablag‘lari hisobidan:

xorijiy va mahalliy mutaxassislarni Markazda tashkil etiladigan kurslarning o‘quv jarayonlariga konsultant, ma'ruzachi va o‘qituvchi sifatida jalb etib, ularga mehnat bozorining amaldagi kon'yunkturasini hisobga olgan holda ish haqi va boshqa to‘lovlar;

Markaz xodimlariga har oylik ustama va moddiy rag‘batlantirishning boshqa turlari, shuningdek, ularning miqdori mustaqil belgilanadi;

v) TDYuU rektoriga TDYuU va uning huzuridagi ta'lim muassasalarining budjetdan tashqari mablag‘larini qayta taqsimlash huquqi beriladi.