Qozog‘istonda kelasi haftada koronavirusga qarshi vaksina ishlab chiqaruvchi zavod ishga tushadi

Qozog‘istonda kelasi haftada Rossiya bilan hamkorlikdagi koronavirusga qarshi vaksina ishlab chiqaruvchi zavod ishga tushadi. Bu haqda Qozog‘iston prezidenti Qosim-Jo‘mart To‘qayev ma'lum qildi.

"Yaqin kunlarda, kelasi haftada Rossiya bilan hamkorlikdagi vaksina ishlab chiqaruvchi zavodni ishga tushiramiz", - dedi u MDH davlat rahbarlari kengashi yig‘ilishida. 

 To‘qayev MDH davlatlariga koronavirus infeksiyasiga qarshi hamkorlikni kuchaytirishni taklif qildi.

"Bugun birinchi navbatdagi vazifamiz fuqarolarimizga virusga qarshi vaksinalarga ega bo‘lish imkoniyatini taqdim etishdir", - dedi u.

Mazkur zavod qurilishi iyun oyida boshlangandi. Bu yerda immunobiologik dori vositalari, jumladan koronavirus infeksiyasiga qarshi vaksina ishlab chiqariladi.

Ma'lumot berilishicha, Qozog‘istonda aholini koronavirusga qarshi ommaviy emlash 2021 yil boshlarida boshlanishi rejalashtirilgan.