Ayrim internet nashrlari vakillari Jo‘qorg‘i Kenges sessiyasiga kiritilmadi

Kun.uz muxbirining xabariga ko‘ra, binoga kirishda undan telefon va boshqa qurilmalarini tashlab ketish so‘ralgan. Milliy gvardiya xodimlaridan bunga huquqiy asos so‘ralganda, hech qanday javob berilmagan. Keyinroq esa sessiya yig‘ilishi boshlangani haqidagi vaj bilan muxbir sessiyaga kiritilmagan.

Kiritilmaganlar orasida Kun.uz muxbiridan tashqari KRuz.uz sayti va Karinform.uz sayti muharrirlari ham bor. Ular ham yuqoridagi sabablar bilan sessiyaga kiritilmagan. 

Karinform.uz sayti muharriri bilan qiziq holat kuzatilgan. Islam Matekov binoga kirishda telefon, fotoapparatlarini qoldirib ketishga rozi bo‘lgan. Ammo qurilmalar solinadigan sumkani qo‘yib ketishga ham, olib kirishga ham ruxsat berilmagan. Matekov bunga ham rozi bo‘lib sumkasini deraza qarshisiga qo‘yib, ichkariga kirgan. Bu payt esa sessiya boshlanib ketgani uchun zalga kiritilmagan.

Sessiya 15:00da boshlanishi kerak bo‘lgan. Qoraqalpog‘istondagi jurnalistlar sanoat mahsulotlari ko‘rgazmasiga 14:00da chaqirilgan. Soat 12:00lar atrofida Qoraqalpog‘iston Respublikasi Vazirlar Kengashining axborot xizmati xodimlari ko‘rgazma soat 13:00da bo‘lishini aytishgan. Jurnalistlar belgilangan vaqtda ko‘rgazma bilan emas, AOKA direktori Asad Xo‘jayev va Vazirlar Kengashi raisi birinchi o‘rinbosari Nurullan Erlepesov bilan norasmiy uchrashgan. Uchrashuv soat 14:48gacha davom etgan. Shu bilan sessiya boshlanishiga 12 daqiqa qolganda jurnalistlarga xabar qilingan.

Muxbir xabariga ko‘ra, Jo‘qorg‘i Kengesning ochiq o‘tadigan yig‘ilishlari, sessiyalari va boshqa tadbirlariga odatda internet jurnalistlari kiritilmaydi.

Eslatib o‘tamiz, joriy yil 28 avgust kuni Urganch shahar hokimligida bo‘lib o‘tgan navbatdan tashqari sessiyaga Kun.uz muxbiri kiritilmagandi. 

Ma'lumot uchun, O‘zbekiston Respublikasi Oliy Majlisi Senati Kengashining 2010 yil 30 dekabrdagi 154-II-sonli qarori bilan tasdiqlangan “Xalq deputatlari viloyat, tuman, shahar Kengashining namunaviy reglamenti”ning 12-moddasiga ko‘ra, sessiyalar ochiq, oshkora o‘tkaziladi va ommaviy axborot vositalari tomonidan yoritiladi.