BioNTech: koronavirusning yangi shtammiga qarshi vaksina 6 haftada tayyor bo‘ladi

Germaniyaning BioNTech farmatsevti laboratoriyasi tasdiqdan o‘tgan vaksina koronavirusning Britaniyada tarqalgan yangi shtammiga qarshi samarali yoki yo‘qligi bo‘yicha aniq bir gap aytish mushkul ekanini ma'lum qildi.

«Ilmiy tarafdan olib qaralsa, virusning yangi shtammlariga qarshi hozirgi vaksina bilan immun tizimi turib bera olishi kerak. Joriy vaksina yangi shtammlarga qarshi qanchalik samaradorligini aniqlash uchun ma'lum tadqiqotlar qilinishi kerak. Mabodo vaksina yangi versiyalarga moslashtirilishi kerak bo‘lsa ham, bunga 6 haftacha vaqt kerak bo‘ladi.

Bizda vaksina yangi shtammga qarshi tura olishi borasida ilmiy ishonch bor, biroq buni tajriba qilmasdan aniqlashning imkoni yo‘q. Tajribaga ikki hafta vaqt kerak. Biz albatta tajriba asosida olingan ma'lumotlarni oshkor qilamiz», degan kompaniya ijrochi direktori Ug‘ur Shahin.

Shunday bo‘lgan taqdirda vaksina qo‘llanishidan oldin muvofiqlashtiruvchi idoralarning tasdig‘idan qayta o‘tkazilishi zarur.

BioNTech’ning Pfizer farmkompaniyasi bilan birga ishlab chiqargan vaksinasi jahonning 45 davlatida tasdiqdan o‘tgan. Vaksinani ma'qullagan davlatlar orasida AQSh, Buyuk Britaniya va Yevropaning qator mamlakatlari bor.

Jahon sog‘liqni saqlash tashkilotining Yevropa bo‘limi o‘z xodimlarini yig‘ib, koronavirusning yangi shtammiga qarshi strategiyani muhokama qildi.

«Vaziyatni diqqat bilan kuzatib turibmiz. Test qilish, tarqalishni kamaytirish borasida strategik qaror qilishga tayyormiz», degan JSSTning Yevropa bo‘limi rahbari Hans Klyuge.