O‘zbekiston pasporti dunyo reytingida 86-o‘rinni egalladi

Henley & Partners tomonidan tuzilgan ro‘yxatda O‘zbekiston uch pog‘onaga pasayib, 86-o‘rinni egalladi. Reytingga ko‘ra, O‘zbekiston fuqarolari 57 mamlakatga vizasiz kirishlari yoki yetib borgandan keyin viza olishlari mumkin.

O‘zbekiston Kot-d'Ivuar va Gabon bilan 86-o‘rinni bo‘lishib oldi.

Yaponiya reytingda birinchi o‘rinda turibdi. Yaponiya fuqarolariga 191ta davlatga vizasiz kirish yoki borgandan keyin viza olish huquqi berilgan. Ikkinchi o‘rinda 190 mamlakat bilan Singapur, uchinchi o‘rinda Janubiy Koreya va Germaniya joylashgan. Ularning fuqarolari 189 mamlakatga vizasiz kirishlari yoki borgandan keyin viza olishlari mumkin.

To‘rtinchi pog‘onada Finlyandiya, Italiya, Lyuksemburg va Ispaniya (188 davlat) bo‘lsa, beshinchi o‘rinda - Avstriya va Daniya (187 davlat). Fransiya, Irlandiya, Niderlandiya, Portugaliya, Shvetsiya 6-pog‘onada (186 davlat), Belgiya, Yangi Zelandiya, Norvegiya, Shveytsariya, Buyuk Britaniya va AQSh 7-o‘rinda (185 davlat). Sakkizinchi pog‘onadan Avstraliya, Chexiya, Gretsiya, Malta (184 davlat), to‘qqizinchi o‘rindan Kanada (183 davlat) va 10-pog‘onadan Vengriya (182 davlat) joy oldi.

MDH mamlakatlaridan Rossiya 50-o‘rinda (116 davlat), Belarus va Qozog‘iston 70-o‘rinda (75 davlat), Ozarboyjon 76-o‘rinda (67), Armaniston 80-o‘rinda (63), Tojikiston 85-o‘rinda (58) va Turkmaniston 90-o‘rinda (53 davlat).

Reytingning so‘nggi qatoridan Afg‘oniston joy olgan. Mazkur davlat fuqarolari uchun 26ta mamlakatga vizasiz kirish imkoni mavjud.