Qayd etilishicha, bugun Yangi-Angren IESda hech qanday yong‘in, avariyaviy o‘chish yoki boshqa favqulodda holatlar yuz bermagan va barcha energiya uskunalar soz holatda ishlamoqda.
«Videolavha Yangi-Angren IES qozonxonalarida ko‘mir kulidan tozalash ishlari amalga oshirilayotganda yoki odatiy texnologik jarayon amalga oshirilayotgan paytda olingan bo‘lishi mumkin.
Hozirgi kunda mazkur issiqlik elektr stansiyasidagi energiya bloklar dispetcher tomonidan berilgan rejimga asosan va soz holatda ishlamoqda. Favqulodda holat mavjud emas.
Energetika vazirligi ijtimoiy tarmoq foydalanuvchilaridan yolg‘on xabarlarni tarqatmaslik va tasdiqlanmagan xabarlarga ishonmaslikni so‘rab qoladi», deyiladi vazirlik matbuot xizmati munosabatida.
Eslatib o‘tamiz, joriy yilning 20 yanvar kuni Yangi-Angren issiqlik elektr stansiyasining profilaktika choralarini ko‘rish uchun to‘xtatilgan 5-energiya blokida chang-ko‘mirli havo aralashmasining portlashi sodir bo‘lgandi.
Favqulodda vaziyatlar vazirligi xabariga ko‘ra, rejali xizmat ko‘rsatish paytida sodir bo‘lgan hodisa natijasida uch kishi olingan jarohat sababli vafot etgan, yana uch kishi turli darajada kuyish tan jarohatini olgan.
