00:22 / 19.03.2021
31889
“Байден эртага жуда банд”: Оқ уй Путиннинг таклифига жавоб қайтарди
Фото: Reuters

Оқ уй АҚШ президенти Жо Байден жуда бандлиги сабабли яқин кунларда Россия президенти Владимир Путин билан музокаралар ўтказа олиши ёки йўқлигини билмаслигини маълум қилди. Аввалроқ Путин Байденга 19 ёки 22 март куни жонли эфирда мулоқот қилишни таклиф қилганди.

“Айтишим мумкинки, президентимиз президент Путин билан суҳбатда бўлди. У ҳали мулоқот қилмаган кўплаб етакчилар бор. Биз Россия раҳбарияти, ҳукумати аъзолари билан барча даражада мулоқот қилмоқдамиз. Бироқ мен бўлғуси музокаралар борасида ҳеч нарса айта олмайман. Президент эртага Жоржияга боради ва жуда банд бўлади ”, деб айтган Оқ уй матбуот котиби Жен Псаки брифингда.  

17 март куни Жо Байден АВС телеканалига берган интервьюсида бошловчининг “Путинни қотил деб ўйлайсизми?” деган саволига “Ҳа” деб жавоб берганди ва Россия президенти АҚШдаги сайловларга аралашув учун “товон тўлаши”ни айтганди.

Шунингдек, брифинг вақтида Псакидан “Байден Путин ҳақида айтган сўзлари учун афсусланмаяптими?” деб сўралганда, “йўқ” деб жавоб қайтарган.

“Йўқ. Президент очиқча саволга очиқча жавоб берди”, деб айтган Оқ уй матбуот котиби. 

У, шунингдек, АҚШ ҳукумати Россия билан ҳамкорлик қилиш учун умумий соҳалар топа олишини қўшимча қилган. 

“Президент Байден ва президент Путинда, шубҳасиз, ўз давлатлари ва дунёда ўзаро ҳаракатланиш бўйича ўз қарашлари бор. Бироқ улар биргаликдаги ҳамкорлик учун ишлашни давом эттириш, изланиш кераклиги борасида ҳамфикрлар. Ўзаро манфаатли соҳалар мавжуд ва биз бундай йўлларни излашни давом эттиришимиз мумкин”, деб таъкидлаб ўтган Псаки.

18 март куни Путин америкалик ҳамкасбининг сўзларига изоҳ бериб, унга соғлиқ тилаб қолишини ва бунда “киноя қилмаётганини” ҳамда “Ким нима деган бўлса, ўзи шунақа” деб жавоб берган. 

Кейинроқ Россия президенти Байденга мулоқотни жонли эфирда давом эттиришга тайёрлигини, буни “эртага (19 март) ёки душанба (22 март) амалга ошира олишини, чунки дам олиш кунлари тайгага боришини” айтган. Шундан кейин Россия ташқи ишлар вазирлиги президентларнинг суҳбатига тайёргарлик кўришни бошлагани маълум қилинган. 

Top