Germaniyada karantin aprel o‘rtasigacha uzaytirildi 

Germaniya kansleri Angela Merkel mamlakatda karantin rejimi 18 aprelgacha uzaytirilishini e'lon qildi. Shuningdek, aprel boshiga to‘g‘ri keladigan Pasxa bayramiga cheklovlar kuchaytiriladi.

Germaniyada karantin 2020 yil noyabrida kiritilgandi, 16 dekabrdan esa cheklovlar qat'iylashtirilgandi. 
        
“Hozirda biz juda jiddiy vaziyatda qolmoqdamiz. Koronavirus mutatsiyalari jiddiy xavf bo‘lib qolmoqda”, deb aytgan Merkel. 

Karantinning uzaytirilishi Pasxa bayramida virusning tarqalishi xavfini kamaytirishi kutilmoqda. 

Bavariya bosh vaziri Markus Zeder ushbu qarorni “Pasxa lokdauni” deb atagan. Kox institutida Germaniyada virus tobora jadal tarqalayotgani va mamlakatga pandemiyaning uchinchi to‘lqini yopirilayotgani aytilgan. Hukumat virusning yuqumliroq britancha shtammi tarqalishidan ayniqsa xavotirlanmoqda. Emlashdagi muammolar ortida hukumat faqatgina vaksinalarga tayanib qolmay, cheklovlar kiritishga qaytmoqda.   

1 apreldan 5 aprelgacha mamlakatda deyarli barcha do‘konlar yopiladi. Diniy xizmatlar onlayn-rejimga o‘tkaziladi. 3 aprel kuni faqat oziq-ovqat do‘konlari ishlaydi. Bundan tashqari, 3 kun davomida kunlik kasallanish darajasi 100 ming kishiga 100 kasallangandan oshadigan hududlarda qat'iyroq cheklovlar kiritiladi. 

Merkel, shuningdek, ayni vaqtda xorijiy safarlar qat'iyan tavsiya qilinmasligini aytgan. 

Ayni vaqtda Germaniyada qishdagidan ko‘ra yengilroq karantin amal qilmoqda. Mart boshidan cheklovlar yengillashtirila boshlagandi. Hozirda maktablar, bolalar bog‘chalari, sartaroshxonalar, go‘zallik salonlari, gul va kitob do‘konlari faoliyat yuritmoqda. 

Mamlakatda yanvar va fevral oylarida kasallanish darajasi pasaya boshlagandi. Biroq virus aholi orasida tez tarqala boshlagan va mart oyidan ko‘rsatkichlar yana o‘sgan.  

22 mart kunidan restoranlar terrasalari, kinoteatr va teatrlarni ochish mo‘ljallangandi, biroq endi bu rejalar keyinga qoldirilmoqda. 

Avvalroq Yevropa davlatlarida cheklovlarning to‘liq bekor qilinishi yoz oxiridan oldin yuz bermasligi mumkinligi ma'lum qilingandi.