Kadastr agentligiga qo‘shimcha huquqlar beriladi

Prezidentning “Yerdan foydalanish to‘g‘risidagi qonun hujjatlariga qat'iy rioya etilishini ta'minlash hamda bu sohada davlat nazoratini takomillashtirish chora-tadbirlari to‘g‘risida”gi farmoni loyihasi e'lon qilindi.

Yerdan foydalanish hamda shaharsozlik to‘g‘risidagi qonun hujjatlariga qat'iy rioya etilishini ta'minlashda vakolatli davlat organlari va tashkilotlari mas'uliyatini yanada oshirish maqsad qilingan.

Davlat soliq qo‘mitasi huzuridagi Kadastr agentligiga quyidagi qo‘shimcha huquqlar beriladi:

yerlardan foydalanish to‘g‘risidagi qonun hujjatlariga so‘zsiz rioya etilishini monitoring qilish;

Ma'muriy javobgarlik to‘g‘risidagi kodeksning xo‘jalik ichidagi yer tuzish loyihalaridan o‘zboshimchalik bilan chetga chiqish, o‘zboshimchalik bilan egallab olingan o‘z hududiga tutash va tutash bo‘lmagan yer maydonlarida qurilish ishlarini amalga oshirganlik yuzasidan ma'muriy huquqbuzarliklar to‘g‘risidagi ishlarni ko‘rib chiqish.

Belgilanishicha:

• 2021 yil 1 sentyabrdan boshlab yengil qurilmalarga, ko‘chmas mulk obektlariga, shu jumladan qurilishi tugallanmagan bino va inshootlarga bo‘lgan huquqlarni davlat ro‘yxatidan o‘tkazish bilan birga, ko‘chmas mulk obektlariga bo‘lgan huquqlarning davlat reyestri bilan integratsiyalashgan matritsali shtrix kod (QR-kod) biriktirilishi;
• 2021 yil 1 avgustdan boshlab yangi ajratilgan yer uchastkasi yoki qurilgan (qurilishi tugallanmagan) boshqa ko‘chmas mulk obektining fasad qismida ularning egalari tomonidan QR-kod joylashtirilishi;
• 2021 yil 1 avgustga qadar barcha yer fondi uchastkalari, bino va inshootlar, shu jumladan yengil qurilmalar xatlovdan o‘tkazilib, davlat reyestriga QR-kod orqali biriktirilishi;
• 2021 yil 1 sentyabrga qadar barcha yer uchastkalarida yoki ularda joylashgan bino va inshootlarning fasad qismida to‘liq QR-kod joylashtirilishi ta'minlanadi.

QR-kodda yer uchastkasini ajratish bo‘yicha ruxsat beruvchi hujjat (bayonnoma)dan ko‘chirma, qurilish (joylashtirish) obekti toifasi, yer uchastkasidan foydalanish huquqi va boshqa zarur ma'lumotlar aks ettiriladi.

Belgilanishicha, agentlikning tuman (shahar) bo‘linmasi:

• yer uchastkalarini o‘zboshimchalik bilan egallash hamda tegishli ruxsat beruvchi hujjatlarda belgilanganidan ortiqcha yerdan foydalanish holatlari yuzasidan ushbu obektga kirish uchun vaqtincha cheklash bo‘yicha dalolatnoma tuzadi va zarur hollarda uning atrofini to‘liq lenta bilan o‘rab oladi;
• vaqtincha cheklov o‘rnatilgan, o‘zboshimchalik bilan egallab olingan yer uchastkasi (bino, inshoot)ni bo‘shatish, unda joylashgan noqonuniy qurilish obektini ixtiyoriy buzib tashlash to‘g‘risida qurilishni amalga oshirgan (oshirayotgan) jismoniy shaxsga yoki yuridik shaxs rahbariga (uning vakiliga) qat'iy hisobi yuritiladigan raqamlangan maxsus ogohlantiruvchi yozma ko‘rsatma beradi.

Yozma ko‘rsatma talabi 15 kunlik muddatda bajarilmaganda:

• agentlikning vakolatli mansabdor shaxsi ma'muriy huquqbuzarlik to‘g‘risida bayonnoma tuzadi hamda noqonuniy qurilish obektini majburiy buzdirish, o‘zboshimchalik bilan egallab olingan yer uchastkasi (bino, inshoot)ni bo‘shatish va yer maydonini o‘z holatiga keltirish bo‘yicha sudga da'vo arizasi kiritadi;
• o‘zboshimchalik bilan imorat qurish natijasida huquqlari buzilgan shaxs(lar) yoxud vakolatli boshqa davlat organi tomonidan noqonuniy qurilish obektini majburiy buzdirish bo‘yicha sudga da'vo arizasi kiritilishiga ruxsat beriladi.

Yer uchastkalarini o‘zboshimchalik bilan egallash hamda tegishli ruxsat beruvchi hujjatlarda belgilanganidan ortiqcha yerdan foydalanish holatlari yuzasidan ushbu obektga kirish uchun vaqtincha cheklash talabiga bo‘ysunmaslik hokimiyat vakilining qonuniy talablarini bajarmaslik etib baholanadi va belgilangan tartibda javobgarlikka tortish uchun asos hisoblanadi.

Shunday tartib o‘rnatiladiki, unga muvofiq 2022 yil 1 sentyabrdan:

• agentlikning vakolatli mansabdor shaxslari ma'muriy huquqbuzarlik to‘g‘risidagi ishlarni rasmiylashtirish va ko‘rib chiqish uchun maxsus dasturiy ta'minot o‘rnatilgan mobil qurilma (planshet) orqali ma'muriy huquqbuzarlik to‘g‘risidagi bayonnomani tuzadi va huquqbuzarga axborot-telekommunikatsiya tarmog‘i orqali ushbu bayonnomaning elektron yoki qog‘oz shaklini taqdim etadi;
• bayonnomani tuzuvchi mansabdor shaxs huquqbuzarning biometrik hujjatlarini planshet yordamida yoki yuz tuzilishini rasmga olib yoxud barmoq izlarini tushirish orqali real vaqt rejimida Ichki ishlar vazirligi va (yoki) Vazirlar Mahkamasi huzuridagi Davlat personallashtirish markazi bazasidan uning shaxsini aniqlaydi;
• huquqbuzar bayonnomada ko‘rsatilgan ma'muriy huquqbuzarlikni o‘zi sodir etganiga e'tiroz bildirmagan taqdirda, u bayonnomani planshetdagi maxsus skanerlovchi uskuna orqali barmoq izlarini tushirish yo‘li yoki elektron grafik imzosi bilan tasdiqlaydi. Huquqbuzar o‘z jismoniy nuqsoni tufayli bayonnomani o‘qish yoki imzolash imkoniyatiga ega bo‘lmasa, bayonnoma unga o‘qib eshittiriladi va vakolatli mansabdor shaxs tomonidan bu haqda bayonnomaga belgi qo‘yiladi;
• huquqbuzarga tayinlangan jarimani “Elektron hukumat”ning yagona billing tizimi orqali masofaviy to‘lash imkoniyati yaratiladi.