Xalqaro aeroportlar va temir yo‘l vokzallarida kulolchilik mahsulotlari savdosi uchun maxsus joylar ajratiladi

«Kulolchilikni jadal rivojlantirish va qo‘llab-quvvatlash chora-tadbirlari to‘g‘risida»gi prezident qarori qabul qilindi.

Qarorga ko‘ra, 2021–2023 yillarda kulolchilik mahsulotlari ishlab chiqarish hajmini oshirish bo‘yicha istiqbolli rejalar tasdiqlandi.

Belgilanishicha, joriy yilda 5 400 dona mahsulot ishlab chiqarish nazarda tutilgan.

Shuningdek, yangidan tashkil etiladigan kulolchilik markazlaridagi turar va noturar joylar uchun mol-mulk va yer solig‘i stavkalari ularga nisbatan mulk huquqi kulollarga berilgan oydan boshlab uch yil davomida 50 foiz miqdorida o‘rnatiladi.

Oilaviy tadbirkorlikni rivojlantirish dasturlari doirasida hunarmandchilik uchun Markaziy bankning asosiy stavkasida 500 milliard so‘m miqdorida kredit ajratiladi.

2021 yil 1 aprelgacha usta-shogird an'analari asosida yoshlarga hunar o‘rgatayotgan kulollarga shogirdlar tayyorlashi, zarur xomashyo sotib olishi va shogirdlarni ish haqi bilan ta'minlashi uchun subsidiyalar ajratish tartibi joriy etiladi. 

Xalqaro aeroportlar «Duty free» hududlarida va temir yo‘l vokzallarida kulolchilik va boshqa turdagi hunarmandchilik mahsulotlari savdosi uchun maxsus joylar ajratiladi.

Bundan tashqari, vazirlik, idoralar, tijorat banklari hamda davlat korxonalari 2022 yil 1 sentyabrgacha kulollar bilan to‘g‘ridan to‘g‘ri shartnoma tuzish orqali kulolchilik mahsulotlarini xarid qilishi mumkin.