Andrey Kubatinning o‘limi holati yuzasidan jinoyat ishi qo‘zg‘atish rad etildi

Bosh prokuratura rasmiy bayonotiga ko‘ra, joriy yil 28 yanvar kuni “Facebook” ijtimoiy tarmog‘ida fuqaro Klara Saxarova (marhumning opasi) ukasi Andrey Kubatinning o‘limiga shifokorlar aybdor ekani va ularning harakatlariga baho berilishi kerakligi haqida murojaat qoldirgan.

Mazkur holat yuzasidan Zangiota tumani prokuraturasi tomonidan tergovga qadar tekshiruv harakatlari o‘tkazilib, 2021 yil 28 yanvar kuni Respublika sud-tibbiy ekspertiza ilmiy-amaliy markazi Toshkent viloyati filialiga komission sud-tibbiy ekspertizasi tayinlangan. 

Komission ekspertizaning 16-sonli xulosasiga ko‘ra, 1984 yilda tug‘ilgan A.Kubatin “COVID-19 infeksiyasi, og‘ir kechishi, asorati ikki tomonlama shifoxonadan tashqari interstitsial polisegmentar pnevmoniya, nafas yetishmovchiligi III-daraja, endogen intoksikatsiya, o‘pka shishi, o‘pka yurak qon tomiri yetishmovchiligi 3-darajasi, hamroh gipertoniya kasalligi, semizlik 1-2-darajasi, shuningdek, poliorgan yetishmovchilik tufayli vujudga kelgan o‘tkir o‘pka-yurak yetishmovchiligidan vafot etgan”.

Shuningdek, O‘zbekiston Sog‘liqni saqlash vazirligi tomonidan o‘tkazilgan xizmat tekshiruvi xulosasida bemor A.Kubatinga nisbatan tashxis to‘g‘ri qo‘yilgani ko‘rsatilgan.

Shu bilan birga, xizmat tekshiruvi hamda ekspertiza xulosalarida, marhum A.Kubatinning o‘limiga sabab bo‘lgan holatlar ya'ni - ikki tomonlama subtotal, interstitsial zotiljam oqibatida vujudga kelgan og‘ir darajali nafas va yurak qon tomiri yetishmovchiligi, to‘qimalar og‘ir darajadagi gipoksiyasi uning hayotlik davrida 2-son Zangiota maxsus klinika shifokorlari tomonidan aniqlangan bo‘lib, tekshiruv va davo muolajalari Sog‘liqni saqlash vazirligining 2020 yil 20 sentyabrdagi 8-son “Koronavirus infeksiyasi bilan kasallangan bemorlarni profilaktika, diagnostika, davolash va reabilitatsiyasi bo‘yicha vaqtinchalik milliy metodik tavsiyasi”ga asosan to‘g‘ri va asosli o‘tkazilgani qayd etilgan.

Tergovga qadar tekshiruv natijasiga ko‘ra, Zangiota tuman prokuraturasi tomonidan 2021 yil 28 fevral kuni jinoyat ishi qo‘zg‘atishni rad etish haqida qaror qabul qilingan.

Eslatib o‘tamiz, Andrey Kubatin vafotiga qadar (2019 yil dekabrdan buyon) O‘zbekiston Fanlar akademiyasi Milliy arxeologiya markazida faoliyat yuritib kelgan.

Toshkent davlat sharqshunoslik institutining katta o‘qituvchisi bo‘lib ishlagan yosh olim 2017 yili Jinoyat kodeksining 157-moddasi (“Davlatga xoinlik qilish”)da nazarda tutilgan jinoyatni sodir etishda ayblanib hibsga olingandi. O‘sha yili Kubatinga nisbatan 11 yilga ozodlikdan mahrum qilish jazosi tayinlangan.

2019 yil 26 sentyabr kuni Toshkent viloyati sudida Kubatinning ishi qayta ko‘rib chiqilgan va olim to‘liq oqlanib, sud zalidan ozod etilgandi. 

Avvalroq, Klara Saxarovaning nohaq tergov va sud qilinishi natijasida Kubatin va uning oilasiga yetkazilgan ma'naviy zararni undirish to‘g‘risidagi da'vosi arizasi Fuqarolik ishlari bo‘yicha Uchtepa tumanlararo sudida ko‘rilib, qanoatlantirishdan rad etilgan edi.