Sudda qatnashgan Kun.uz muxbirining xabar berishicha, majlisga javobgar sifatida chaqirilgan Toshkent shahar Moliya boshqarmasi va da'vogar yashash joyi bo‘yicha chaqirilgan qo‘shimcha javobgar - Bektemir tumani Moliya boshqarmasi vakillari kelmagan.
Sud ishi marhum Andrey Kubatinning opasi, da'vogar Klara Saxarovaning roziligi bilan javobgar taraflar ishtirokisiz ko‘rib chiqildi.
Sud ishida muzokaraga o‘tildi va da'vogarning muzokara nutqi tinglandi.
Sudya qaror qabul qilish uchun alohida xonaga kirib chiqqanidan so‘ng, ish bo‘yicha hal qiluv qarorini e'lon qildi.
Unga ko‘ra, Klara Saxarovaning da'vo talablari qanoatlantirishdan rad etildi. Shuningdek, sudya protsess ishtirokchilariga nima sababdan bunday qarorga kelgani haqida izoh berib o‘tdi.
Da'vogarga sud qarori ustidan belgilangan tartibda shu sud orqali apellyatsiya shikoyati kiritish huquqi borligi tushuntirildi.
Eslatib o‘tamiz, shu yilning 25 yanvar kuni bo‘lib o‘tgan birinchi sud majlisida marhum Andrey Kubatinning opasi javobgar Toshkent shahar Moliya boshqarmasidan yetkazilgan ma'naviy zarar uchun 3,5 milliard so‘m mablag‘ undirishni so‘ragan edi.
Javobgar - Toshkent shahar Moliya boshqarmasi vakili esa, ushbu summa davlat budjeti hisobidan emas, balki marhumga ma'naviy zarar yetishiga sabab bo‘lgan organlar, uni tergov qilgan tashkilotlar, prokuratura va ayblov hukmini chiqargan sud tomonidan qoplanishi kerakligini aytgan.
