17:14 / 01.04.2021
8180
«Кимларнингдир иштироки бўлган» — «Ўзбекнефтгаз» Бошқарув раиси тизим йиллар давомида ёпиқ бўлгани ҳақида

«Ўзбекнефтгаз» АЖ бошқарув раиси Меҳриддин Абдуллаев Қашқадарёдаги «Зеварда» конида сиқув компрессор станциясининг ишга туширилишига бағишланган тадбирда йиллар давомида тизим умуман ёпиқ бўлганига изоҳ берди.

Абдуллаев мазкур станциянинг иккинчи босқичи 14 йил ўтиб ишга туширилган бўлса-да, ўтган вақт давомида бу ерга журналистлар умуман келмаганини маълум қилди.

«Ўзбекнефтгаз»нинг ёпиқ бўлганига сабаб, сунъий равишда ёпиқ бўлган. Оддий тендерлар ҳам ёпиқ бўлган, маҳсулот сотиб олиш, қабул қилиш, улар билан ишлашнинг ҳаммаси ёпиқ бўлган. Кимларнингдир иштироки бўлган. Президентимиз битта масала қўйганларки, шу нарсалар очиқ бўлсин. Мен айтаманки, битта мих олсак ҳам очиқ бўлсин, халқ кўриб турсин.

Ҳозир биз онлайн кўргазмалар қиляпмиз, ҳар битта заводимизнинг 3D моделини яратяпмиз. Очиб қўямиз, мана нима олсак, марҳамат, имконияти бўлса кирсин шунга, олсин.

Қарзлар масаласи ҳам ёпиқ бўлган. Ундан ташқари, соҳанинг ўзи ёпиқ бўлган. Мана ҳозир келиб кўряпсизлар, асосий, муҳим объект бўлса ҳам, сизларнинг имкониятларингиз бор келиб кўришга. Ҳозир бизнинг ҳар бир хатти-ҳаракатимиз очиқлик, очиқлик, очиқлик», – деди Меҳриддин Абдуллаев.

«Ўзбекнефтгаз» АЖ бошқарув раиси шунингдек, тизимдан кучли кадрларнинг кетиб қолгани, уларни қайтариш чоралари кўрилаётгани ҳақида гапирди. У иқтидорларнинг кетиб қолганини улар ўз вақтида меҳнатига яраша рағбат олмагани билан изоҳлади.

Меҳриддин Абдуллаевнинг сўзларига кўра, тизимдаги ходимларнинг ойлиги шу вақтга қадар умумий харажатнинг 4 фоизини ташкил қилиб келган бўлса, ҳозирги кунда 7 фоизга етказилган.

Top