Ayrim hududlarda budjet tashkilotlari xodimlariga muayyan davr ishlaganlik uchun har oyda taqdirlash puli to‘lanadi

Bandlik va mehnat munosabatlari vazirligi va Moliya vazirligining “Uchquduq, Zarafshon, Nurobod shaharlari va Zafarobod shaharchasida budjet muassasalari va tashkilotlari xodimlariga muayyan davr ishlaganlik uchun har oyda taqdirlash puli to‘lash tartibi to‘g‘risidagi nizomni tasdiqlash haqida”gi qarori loyihasi e'lon qilindi.

Nizom Vazirlar Mahkamasining 1994 yil 10 dekabrdagi 594-son “Qizilqumnodirmetalloltin” konserni va “Olmaliq kon-metallurgiya kombinati” korxonalarini yuqori malakali mutaxassislar va ishchilar bilan ta'minlash chora-tadbirlari to‘g‘risida”gi qaroriga asosan Uchquduq, Zarafshon, Nurobod shaharlari va Zafarobod shaharchasida budjet muassasalari va tashkilotlari xodimlariga muayyan davr ishlaganlik uchun har oyda taqdirlash puli to‘lash tartibini belgilaydi.

Uchquduq, Zarafshon, Nurobod shaharlari va Zafarobod shaharchasida budjet muassasalari va tashkilotlari xodimlariga muayyan davr ishlaganlik uchun oylik to‘lovlar, xodimning yuqorida keltirilgan shaharlar hududlaridagi budjet muassasalari va tashkilotlarida ishlagan ish stajidan kelib chiqib, quyidagi miqdorlarda belgilanadi:

Muayyan davr ishlaganlik uchun belgilangan miqdordagi oylik to‘lovlar to‘lash huquqi xodimlar budjet muassasalari va tashkilotlarida ishlashni boshlagan vaqtdan boshlab yuzaga keladi.

Misol uchun, xodim 2000 yilning 1 iyulidan ishga qabul qilingan va 2000 yilning 1 iyuldan unga muayyan davr uchun stavka (oklad)ning 0,25 foiz miqdorida oylik haq to‘lanadi.

Muayyan davr ishlaganlik uchun oylik to‘lovlarni amalga oshirish huquqini beruvchi ish stajiga quyidagilar kiritiladi:

Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlarida ishlagan davri;

xodim haqiqatda ishlamagan bo‘lsa ham, lekin amaldagi qonunchilikka asosan Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlarida xodimning ish joyi (lavozimi) saqlangan davr.

Mulkchilik shaklidan qat'iy nazar boshqa tashkilotdan Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlariga ishga kirganda, ish staji saqlanib qolinadi.

Bunda mulkchilik shaklidan qat'iy nazar boshqa tashkilotdagi (Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlaridan tashqari) ish, budjet tashkilotlari xodimlariga muayyan davr ishlaganlik uchun oylik to‘lovlar to‘lanishi huquqini beradigan ish stajiga kiritilmaydi.

Mehnat daftarchasi xodimning mehnat stajini tasdiqlovchi asosiy hujjat hisoblanadi.

Mehnat daftarchasida aks ettirilmagan ish staji, xodim ishlagan muassasa va tashkilot rahbari tomonidan imzolangan ma'lumotnoma bilan tasdiqlanishi mumkin.

Muayyan davr ishlaganlik uchun oylik to‘lovlar xodimning oylik tarif stavkasi yoki belgilangan tarif stavkasidan (lavozim okladi) kelib chiqib hisoblanadi.

Muayyan davr ishlaganlik uchun oylik to‘lovlar shu oy davomida ishlagan vaqti, mehnat ta'tili va vaqtinchalik mehnatga layoqatsizlik davri uchun ham, shuningdek, amaldagi qonunchilikka asosan xodimning to‘liq yoki qisman oylik ish haqi saqlangan davrlari uchun to‘lanadi.

Agar xodim kalendar oyi davomida ish muayyan davr ishlaganlik uchun oylik to‘lov olish huquqi paydo bo‘lsa, ushbu to‘lovni birinchi hisoblash ushbu to‘lovni olish huquqi paydo bo‘lgandan keyin ishlagan vaqt uchun amalga oshiriladi.

Muayyan davr ishlaganlik uchun oylik to‘lovlar rayon koeffitsiyentlari va cho‘l, suvsiz, baland tog‘ hududlarida ishlaganlik uchun belgilangan koeffitsiyentlar qo‘llaniladigan mehnat haqiga qo‘shib hisoblanadi.

Muayyan davr ishlaganlik uchun oylik to‘lovlar pensiyalar, mehnat ta'tili uchun beriladigan haq, ishdan bo‘shatish nafaqasi, xodimning o‘z mehnat vazifalarini bajarishi vaqtida tan jarohati yoki sog‘lig‘i boshqacha tarzda shikastlanishi sababli yetkazilgan zararni qoplashda o‘rtacha oylik ish haqini hisoblash, shuningdek, o‘rtacha oylik ish haqini hisoblab chiqarish talab etiladigan holatlarda inobatga olinadi.