10:33 / 04.04.2021
8360
Январда эмланган Аргентина президентида коронавирус аниқланди

2021 йил январида коронавирусга қарши “Спутник V” вакцинаси билан эмланган Аргентина президенти Альберто Фернандесда коронавирус аниқланди.

Альберто Фернандес/Фото: Henry Romero / Reuters

El Cronista нашрининг шифокорларга таяниб хабар беришича, Фернандеснинг ПЦР-тести мусбат чиққан. Уларнинг таъкидлашича, президентда касаллик вакцинанинг ҳимояловчи таъсири эвазига енгил ўтмоқда.

3 апрелда Фернандес коронавирусга топширган антиген тести мусбат чиққанини маълум қилган. Аргентина етакчисининг таъкидлашича, у енгил бош оғриғи ва ҳарорати 37,3 даражага кўтарилгандан кейин вирусга таҳлил топширишга қарор қилган.

62 ёшли Фернандес вирусга чалинганига қарамай, аҳолини эмланишдан бош тортмасликка чақирган. “Агар мен эмланмаганимда, унда ҳозир аҳволим оғир бўлиши мумкин эди”, деб таъкидлаб ўтган Аргентина раҳбари.

Фернандеснинг рафиқаси Фабиола Янес ҳам вирусга тест топширган, бироқ унинг натижаси манфий чиққан.

“Спутник V”ни ишлаб чиққан Россиянинг Гамалея номидаги марказида Фернандесга тезроқ соғайиб кетиш тилаб қолинган. Марказда таъкидланишича, вакцина коронавирусга қарши 91,6 фоиз самарадор ҳисобланади ҳамда касалликнинг оғир кечишидан 100 фоиз ҳимоялайди.  

“Агар вирус эмланганларда аниқланган бўлса, унда вакцина уларнинг оғир асоратларсиз тез тузалиб кетишини таъминлайди”, дейилган марказда.

Top