Termizda o‘tgan xalqaro musobaqada uchko‘priklik polvon qiz oltin medalni qo‘lga kiritdi

Uchko‘priklik Pokizaxon Kamoliddinova O‘zbekiston Prezidenti sovrini uchun o‘tkazilgan xalqaro kurash musobaqasida g‘olib bo‘lib, oltin medalni qo‘lga kiritdi.

Joriy yilning 10 va 11 aprel kunlari Termiz shahrida O‘zbekiston Prezidenti sovrini uchun al-Hakim at-Termiziy xotirasiga bag‘ishlangan XV xalqaro kurash musobaqasi o‘tkazildi.

Musobaqada 27 davlatdan yuzdan ziyod polvon va mehmonlar ishtirok etdi.

15-bor tashkil etilgan an'anaviy xalqaro musobaqada erkaklar oltita (-60 kg, -66 kg, -73 kg, -81 kg, -90 kg va +90 kg), ayollar esa beshta (-48 kg, -57 kg, -63 kg, -70 kg, +70 kg) vazn toifasida o‘zaro bellashdi.

Ayollar o‘rtasida +70 kilogramm vazndagi bellashuvlarda g‘oliblik Farg‘ona viloyatining Uchko‘prik tumanidan bo‘lgan Pokizaxon Kamoliddinovaga nasib etdi va u oltin medal bilan mukofatlandi. Mazkur vazn toifasida ikkinchi o‘rin qozog‘istonlik Azman Amayevaga, uchinchi o‘rin esa yana bir o‘zbekistonlik hamyurtimiz Flyura Ergasheva va rossiyalik Guseyo  Vladiyenoga nasib etdi.

Ma'lumot uchun, Al-Hakim at-Termiziy xalqaro musobaqasining umumiy mukofot jamg‘armasi 100 min dollarni tashkil etib, har bir vazn toifasi g‘oliblariga 3 ming dollar, 2-o‘rinni qo‘lga kiritgan sportchilarga 2 ming hamda ikkita 3-o‘rin sohiblariga ming dollar miqdorida pul mukofotlari topshiriladi.