Diniy-ma'rifiy soha xodimlari moddiy rag‘batlantiriladi

Prezident va hukumatning ayrim hujjatlariga o‘zgartirish va qo‘shimchalar kiritildi.

Quyidagi hujjatlarga o‘zgartirish va qo‘shimchalar kiritildi:

• Prezidentning 16.04.2018 yildagi «Diniy-ma'rifiy soha faoliyatini tubdan takomillashtirish chora-tadbirlari to‘g‘risida»gi farmoni;
• Prezidentning 23.05.2017 yildagi «O‘zbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi faoliyatini tashkil etish to‘g‘risida»gi qarori;
• Prezidentning 16.04.2018 yildagi «O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita faoliyatini takomillashtirish chora-tadbirlari to‘g‘risida»gi qarori;
• Prezidentning 4.09.2019 yildagi «Diniy-ma'rifiy soha faoliyatini takomillashtirish bo‘yicha qo‘shimcha chora-tadbirlar to‘g‘risida»gi qarori;
• Prezidentning 11.08.2020 yildagi «Imom Moturidiy xalqaro ilmiy-tadqiqot markazini tashkil etish chora-tadbirlari to‘g‘risida»gi qarori;
• Vazirlar Mahkamasining 6.11.2020 yildagi «O‘zbekiston xalqaro islom akademiyasi huzuridagi Imom Moturidiy xalqaro ilmiy-tadqiqot markazi faoliyatini tashkil etish chora-tadbirlari to‘g‘risida»gi qarori.

Kiritilgan o‘zgartirishlarga muvofiq belgilanishicha, Xalqaro islom akademiyasi Vazirlar Mahkamasi huzuridagi Din ishlari bo‘yicha qo‘mitasi muassisligidagi davlat ta'lim va ilmiy-tadqiqot muassasasi hisoblanadi.

Belgilanishicha, Din ishlari bo‘yicha qo‘mita, O‘zbekiston xalqaro islom akademiyasi, Islom sivilizatsiyasi markazi, Imom Buxoriy xalqaro ilmiy-tadqiqot markazining rahbariyati, o‘qituvchi, ilmiy xodim va mutaxassislariga yagona tarif setkasi bo‘yicha mehnatga haq to‘lash razryadlariga ko‘ra tarif koeffitsiyentlari va bazaviy lavozim maoshlari 3 baravar (Din ishlari bo‘yicha qo‘mita raisiga, Markaz rahbariyati va xodimlariga – 4 baravar) miqdorda qo‘llaniladi.

Millatlararo munosabatlar va xorijiy mamlakatlar bilan do‘stlik aloqalari qo‘mitasi boshqaruv xodimlariga yagona tarif setkasi bo‘yicha mehnatga haq to‘lash razryadlariga ko‘ra tarif koeffitsiyentlari va bazaviy lavozim maoshlari 2 baravar miqdorda qo‘llanilishi belgilangan.

Bundan tashqari, qo‘mita boshqaruv xodimlari lavozim maoshiga quyidagi miqdorlarda har oylik qo‘shimcha haq to‘lanadi:

• fan nomzodi yoki falsafa doktori (PhD) yoxud xorijiy mamlakatlarda ularga tenglashtirilgan boshqa ilmiy darajaga ega shaxslar uchun – lavozim maoshi 30 foizigacha;
• fan doktori (Doctor of Science) yoki xorijiy mamlakatlarda unga tenglashtirilgan ilmiy darajaga ega shaxslar uchun – lavozim maoshi 60 foizigacha miqdorda.

Boshqa o‘zgartirish va qo‘shimchalar ham kiritilgan.