Navoiy va Qashqadaryo viloyatlarining prezident videoselektorida ishdan olingan birinchi o‘rinbosarlari o‘rniga yangilari tayinlandi

To‘lqin To‘ymurodovich Atamurodov — Navoiy viloyati hokimining iqtisodiyot va tadbirkorlik masalalari bo‘yicha birinchi o‘rinbosari lavozimiga tayinlandi.

To‘lqin Atamurodov 1982 yilda Buxoro viloyatida tug‘ilgan. 2002 yilda Toshkent moliya instituti, 2005 yilda esa O‘zbekiston Respublikasi Bank-moliya akademiyasini hamda 2015 yilda «Sun Yat-Sen» universitetini (Xitoy) tamomlagan.

To‘lqin Atamurodov mazkur lavozimga qadar «Mikrokreditbank» aksiyadorlik tijorat banki boshqaruv raisining birinchi o‘rinbosari lavozimida ishlab kelayotgandi.

• 2020 yil fevralidan buyon Navoiy viloyati hokimining iqtisodiyot va tadbirkorlik masalalari bo‘yicha birinchi o‘rinbosari lavozimida ishlagan Odil Hasanov 2021 yil aprel oyi boshida tadbirkorlik masalalariga bag‘ishlangan videoselektor chog‘ida ishdan olingan, prezident shu kuni ishdan olingan rahbarlar davlat ishiga qaytarilmasligini ma'lum qilgandi.

Nodir Erkayev — viloyat hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i etib tayinlangan.

Nodir Erkayev 1971 yilda Chiroqchi tumanida tug‘ilgan. 2017-2018 yillarda Qashqadaryo viloyati davlat soliq boshqarmasi boshlig‘i o‘rinbosari lavozimida faoliyat yuritgan. Mazkur tayinlovgacha u Toshkent shahar davlat soliq boshqarmasi boshlig‘ining birinchi o‘rinbosari vazifasida ishlab kelayotgan edi.

U bu lavozimda 2019 yil oktyabridan buyon ishlagan va 2021 yil aprel oyi boshida tadbirkorlik masalalariga bag‘ishlangan videoselektor chog‘ida ishdan olingan O‘tkir Bo‘tayev o‘rnida ish boshladi.