Ta'lim sifati past maktabga borib ishlaydigan pedagoglarga bir martalik yordam puli qachon beriladi?

Pensiyadagi 2-toifali o‘qituvchilar ham olis hududga borsa, imtiyoz va ustamalar to‘lanadimi?

2021 yil 9 yanvar kungi «Olis hududlardagi budjet tashkilotlariga malakali mutaxassislarni jalb qilish chora-tadbirlari to‘g‘risida»gi prezident qaroriga muvofiq, ta'lim darajasi yuqori bo‘lmagan maktablarda dars berish uchun boshqa hududlardan jalb qilingan faqatgina oliy va birinchi toifaga ega o‘qituvchi-pedagoglarning bazaviy tarif stavkalariga maxsus ustama va imtiyozlar belgilanadi. 2-toifali yoki toifasiz pedagoglarga ustama to‘lash ko‘zda tutilmagan.

Boshqa holatlarda o‘z ixtiyoriga ko‘ra mazkur maktablarda dars berish mumkin. Biroq maxsus imtiyozlardan foydalana olmaydi.

Bir martalik yordam puli, ustama qachondan va kimlarga beriladi?

Oliy toifaga ega va olis hududlarga borib ishlash istagi bo‘lgan o‘qituvchilar Xalq ta'limi vazirligining «Yangi O‘zbekiston ustozlari» loyihasi doirasida www.ustozfondi.uz platformasi orqali ro‘yxatdan o‘tib, tanlovda ishtirok etishi hamda ta'lim sifati past maktablardagi vakant lavozimlarga ishga qabul qilinishi mumkin.

Yuqoridagi platformaga kirib, tanlov shartlari va ta'lim sifati past, vakant lavozimlar mavjud ta'lim muassasalari haqidagi ma'lumotlar bilan tanishib chiqish tavsiya qilinadi.

Prezident qaroriga ko‘ra, olis hududlarda joylashgan budjet tashkilotlariga boshqa hududlardan mehnat faoliyatini amalga oshirish uchun kelgan oliy ma'lumotli mutaxassislarga bazaviy hisoblash miqdorining 50 baravari miqdorida bir martalik boshlang‘ich yordam puli va uy-joylarni ijaraga olganlik (ijarada turganlik) uchun bazaviy hisoblash miqdorining 2 baravari miqdorida har oylik pul kompensatsiyasi beriladi.

2021 yilning 1 martidan boshlab ta'lim darajasi yuqori bo‘lmagan maktablarda dars berish uchun boshqa hududlardan jalb qilingan oliy va birinchi toifaga ega o‘qituvchi-pedagoglarning bazaviy tarif stavkalariga:

• bir ma'muriy-hududiy birliklar doirasida boshqa tuman va shaharlardan kelib faoliyat yuritsa, 50 foiz;
• boshqa ma'muriy-hududiy birlikdan kelib faoliyat yuritayotgan bo‘lsa, 100 foiz ustamalar to‘lanadi.

Bunda ta'lim darajasi yuqori bo‘lmagan maktablarda dars berish uchun boshqa hududda kamida bir yil ishlagan oliy va birinchi toifaga ega o‘qituvchi-pedagoglar jalb qilinishi belgilab qo‘yilgan.

Agar oliy yoki birinchi toifali o‘qituvchi ta'lim sifati yuqori bo‘lmagan, biroq olis hududda joylashmagan maktabda dars bersa, unga faqatgina har oylik maxsus ustamalar belgilanadi.

Oliy toifali o‘qituvchi olis hududga borib ishlasa, bir vaqtning o‘zida ham prezident qarori, ham Vazirlar Mahkamasining 471-sonli qaroriga muvofiq belgilangan ustamalarni olishi mumkinmi?

Agar o‘qituvchi borgan maktab ham ta'lim sifati yuqori bo‘lmagan, ham olis hududdagi maktab bo‘lsa, u holda o‘qituvchilarga bir vaqtning o‘zida ikkita qarorda belgilangan har oylik maxsus ustamalar to‘lanishi mumkin.

Avvaldan olis hududga qatnab ishlayotgan o‘qituvchilarga ham ushbu ustamalar amal qiladimi?

Qarorga muvofiq, ta'lim darajasi yuqori bo‘lmagan maktabga borib ishlash uchun boshqa hududda 1 yillik pedagogik faoliyat yuritgan bo‘lishi lozim.