Fuqarolar shaxsiy ma'lumotiga ishlov berishning alohida shartlarini buzganlar reyestrga kiritiladi

Vazirlar Mahkamasining 2021 yil 29 apreldagi 255-son qarori bilan hukumatning 2018 yil 5 sentyabrdagi «Butunjahon internet tarmog‘ida axborot xavfsizligini yanada takomillashtirish chora-tadbirlari to‘g‘risida»gi qaroriga o‘zgartirish va qo‘shimchalar kiritildi.

O‘zbekistonda fuqarolarning shaxsga doir ma'lumotlariga ishlov berish alohida shartlariga rioya etilishi ustidan davlat nazoratini amalga oshirish tartibi to‘g‘risidagi nizom tasdiqlandi.

Nizomda boshqa tushunchalar qatorida, unda qo‘llanilgan quyidagi asosiy tushunchalarga ham ta'rif berilgan:

• shaxsga doir ma'lumotlar – muayyan jismoniy shaxsga taalluqli bo‘lgan yoki uni identifikatsiya qilish imkonini beradigan, elektron tarzda, qog‘ozda va (yoki) boshqa moddiy jismda qayd etilgan axborot;
• shaxsga doir ma'lumotlarga ishlov berish – shaxsga doir ma'lumotlarni yig‘ish, tizimlashtirish, saqlash, o‘zgartirish, to‘ldirish, ulardan foydalanish, ularni berish, tarqatish, uzatish, egasizlantirish va yo‘q qilish bo‘yicha bir harakatni yoki harakatlar majmuini amalga oshirish;
• shaxsga doir ma'lumotlar sub'yektlari huquqlarini buzuvchilar reyestri – O‘zbekiston fuqarolarining shaxsga doir ma'lumotlariga ishlov berish alohida shartlariga rioya etmagan shaxsga doir ma'lumotlar bazasi mulkdorlari va (yoki) operatorlari ro‘yxati.

Fuqarolarning shaxsga doir ma'lumotlariga ishlov berish alohida shartlariga rioya etilishi deganda O‘zbekiston fuqarolarining shaxsga doir ma'lumotlariga axborot texnologiyalaridan foydalangan holda ishlov berishda, shu jumladan Internet jahon axborot tarmog‘ida ishlov berishda ularning jisman O‘zbekiston hududida joylashgan texnik vositalarda hamda belgilangan tartibda Shaxsga doir ma'lumotlar bazalari davlat reyestrida ro‘yxatdan o‘tkazilgan shaxsga doir ma'lumotlar bazalarida yig‘ilishi, tizimlashtirilish va saqlanishiga oid shartlarga rioya etish majburiyati tushuniladi.

Shaxsga doir ma'lumotlar bazasi operatori – shaxsga doir ma'lumotlarga ishlov berishni amalga oshiruvchi davlat organi, jismoniy va (yoki) yuridik shaxs. Shaxsga doir ma'lumotlar bazasi mulkdori – shaxsga doir ma'lumotlar bazasiga egalik qilish, undan foydalanish va uni tasarruf etish huquqiga ega bo‘lgan davlat organi, jismoniy va (yoki) yuridik shaxs.

Belgilanishicha, O‘zbekiston fuqarolarining shaxsga doir ma'lumotlariga axborot texnologiyalaridan foydalangan holda, shu jumladan Internet jahon tarmog‘ida ishlov berish alohida shartlariga rioya etilishi ustidan davlat nazorati Axborotlashtirish va telekommunikatsiyalar sohasida nazorat bo‘yicha davlat inspeksiyasi tomonidan amalga oshiriladi.

Davlat inspeksiyasi:

• mulkdor va (yoki) operatorlarning O‘zbekiston fuqarolari shaxsga doir ma'lumotlariga ishlov berish alohida shartlariga rioya etishini o‘rganish va tekshirish hamda monitoring va tahlil qilish ishlarini amalga oshiradi;
• fuqarolarning shaxsga doir ma'lumotlariga ishlov berish alohida shartlari buzilgan taqdirda, ushbu qonunbuzilish holatini bartaraf etish yuzasidan davlat organi, jismoniy va (yoki) yuridik shaxslar tomonidan ijro etilishi majburiy bo‘lgan ko‘rsatmalar beradi;
• shaxsga doir ma'lumotlar bazasi mulkdorlari va (yoki) operatorlariga nisbatan ma'muriy huquqbuzarlik to‘g‘risidagi bayonnomalarni tuzadi va ko‘rib chiqish uchun sudga yuboradi;
• mulkdor va (yoki) operatorlarning axborot texnologiyalaridan foydalangan holda, shu jumladan Internet tarmog‘ida shaxsga doir ma'lumotlarga ishlov berish faoliyatlari yuzasidan Vazirlar Mahkamasiga axborot kiritib boradi;
• Shaxsga doir ma'lumotlar sub'yektlari huquqlarini buzuvchilar reyestrini yuritadi hamda xorijiy davlatlar vakolatli organlari xalqaro tashkilotlar bilan shaxsga doir ma'lumotlar sohasida hamkorlikni amalga oshiradi.

Fuqarolarning shaxsga doir ma'lumotlariga ishlov berish alohida shartlarini buzgan mulkdor va (yoki) operatorlarni reyestrga kiritish va reyestrdan chiqarish tasdiqlangan sxemaga muvofiq amalga oshiriladi.