Vazirlar Mahkamasining 2026-yil 13-oktabrdagi 561-son qarori bilan mazkur reyestrlarga doir normativ-huquqiy hujjatlar tasdiqlandi.
Qarorga koʻra, nodavlat sport tashkilotlari reyestri axborot tizimi orqali yuritiladi. Tashkilotlar haqidagi maʼlumotlar ochiq maʼlumotlar sifatida joylashtiriladi.
Reyestrga kiritish toʻgʻrisidagi ariza besh ish kuni ichida koʻrib chiqiladi. Maʼlumotlar toʻliq taqdim etilsa, vakolatli organ qarori bilan tashkilot reyestrga kiritiladi. Hujjatlarda kamchiliklar aniqlansa, uch ish kuni ichida rad etish toʻgʻrisida qaror qabul qilinadi.
Nodavlat sport tashkiloti oʻz xohishi bilan murojaat qilsa, faoliyati belgilangan tartibda tugatilsa yoki shtatida malakali trener boʻlmasa, reyestrdan chiqariladi. Shuningdek, reyestrga kiritilganidan keyin uch oy ichida sportchilar va trenerlar haqidagi maʼlumotlarni kiritmaslik ham reyestrdan chiqarishga asos boʻladi.
Sport inshootlarini reyestrga kiritish uchun ularning mulkdori yoki balansda saqlovchisi axborot tizimi orqali ariza beradi.
Inshootning faoliyat turi sportdan boshqa yoʻnalishga oʻzgartirilsa, u foydalanishga yaroqsiz deb topilsa yoki mulkdor ariza bilan murojaat qilsa, obyekt reyestrdan chiqariladi.
Qarorda sport tashkilotlari sportchilariga rasmiy musobaqalarda ishtirok etish huquqi berilishi ham nazarda tutilgan.
