Sirdaryo viloyati harbiy blok rahbarlari madhiya vaqtida qanday jyest ko‘rsatishni bilmay shoshib qolishdi. Aslida ular nima qilishi kerak edi?

9 may kuni butun mamlakat bo‘ylab Xotira va qadrlash kuni bayram qilindi. Sirdaryo viloyatida o‘tkazilgan tadbirlarda qiziq voqea sodir bo‘ldi va holat kameralarga tushib qoldi.

Gap shundaki, Sirdaryo viloyati hokimi G‘ofurjon Mirzayevning ortida turgan harbiylar davlat madhiyasi yangray boshlashi bilan qanday jyest ko‘rsatishni bilmay shoshib qolishdi. Ular avvaliga qo‘llarini bosh kiyimlariga qo‘ndirib harbiy chest berib turishdi, keyin esa qo‘llarini ko‘kraklariga qo‘yib turishdi. Bu tushunmovchilik to‘rt harbiy ishtirokida bir necha marta takrorlandi va bu vaqt davomida kamera kulgili holatni yozishda davom etdi.

Kun.uz manbasiga ko‘ra, videoda ko‘ringan harbiylar Sirdaryo viloyati harbiy blok rahbarlari, ya'ni DXX, prokuratura, IIB va bojxona xizmatlarining hududiy rahbarlari.

Holat tasvirlangan video internetda shunchalik mashhur bo‘ldiki, u haqda allaqachon memlar, hazillar paydo bo‘ldi. Shu o‘rinda keng muhokamalarga sabab bo‘lgan bu holatda harbiylar o‘zini qanday tutishi kerakligiga qonuniy nazar tashlasak. Bu borada ikkita normativ hujjat harbiylarning harakatlarini tartibga soladi.

1996 yil 9 oktyabrdagi prezident farmoni bilan tasdiqlangan O‘zbekiston Respublikasi Qurolli kuchlarining ichki xizmat nizomida bu borada shunday yozilgan: «Davlat madhiyasi ijro etilayotgan paytda safda turgan askarlar komanda berilmasdan qad rostlagan holatga o‘tadilar. Vzvod komandiri va undan yuqorida bo‘lganlar, bundan tashqari, qo‘llarini bosh kiyimlariga qadaydilar. Safdan tashqarida bo‘lgan harbiy xizmatchi madhiya ijro etilayotgan vaqtda safona qadrost holatiga kiradi, agar bosh kiyimi bo‘lsa, qo‘lini unga qadaydi».

O‘zbekiston Respublikasi Davlat madhiyasi to‘g‘risidagi qonunda ham bu holatni tartibga soluvchi modda bor. Qonunning 7-moddasida shunday yozilgan: «O‘zbekiston Respublikasining Davlat madhiyasi ko‘pchilik huzurida ijro etilganda, agar qonun hujjatlarida boshqacha qoida belgilanmagan bo‘lsa, hozir bo‘lgan kishilar madhiyani tik turib va o‘ng qo‘l kaftini ko‘krakning chap tomoniga qo‘yib, harbiy yoki davlatning boshqa xizmatidagi maxsus kiyimdagi shaxslar esa qo‘lini bosh kiyimiga qo‘yib tinglaydi».

Demak, yuqoridagi qonun va prezident farmoni bilan tasdiqlangan nizomga ko‘ra, Sirdaryoda harbiylar qo‘lini ko‘ksiga qo‘yish orqali harbiy protokol tartibiga rioya qilmagan. Ular keyinchalik qo‘llarini bosh kiyimiga qo‘ndirib, to‘g‘ri qaror qabul qilgan.